Оросын жижиглэнгийн худалдаачид "Apple" компанийн хамгийн сүүлийн үеийн "iPhone 16" утасны урьдчилсан захиалгыг эхлүүлжээ. Ингэснээр ОХУ экспортын хоригийг тойрч, АНУ-аас хэдэн зуун ам.долларын үнэтэй төхөөрөмжүүдийг урьдчилан захиалах боломжийг хэрэглэгчдэд олгосон байна.

Цахилгаан барааны жижиглэн худалдаагаар Орост тэргүүлэгч "M.Video-Eldorado" болон үүрэн холбооны оператор "MTS" нар Пүрэв гаригт ОХУ-д шинэ "iPhone 16"-г анх удаа танилцуулжээ. Утасны хүргэлт ирэх долоо хоногоос эхлэнэ гэлээ.

Барууны орнууд технологийн экспортыг хязгаарлах зорилгоор ОХУ-д хориг арга хэмжээ авсан. Энэ хүрээнд "Apple" компани 2022 оны гуравдугаар сараас хойш Орос дахь борлуулалтаа зогсоож, "ApplePay" зэрэг үйлчилгээгээ хаасан билээ. Гадаадын брэндүүд Турк, Казахстан, Хятад, Энэтхэг, Арабын нэгдсэн Эмират зэрэг хоригт нэгдээгүй улс орнуудаар дамжин тойруу замаар орос хэрэглэгчдэд бүтээгдэхүүнээ хүргэдэг. Шинэ утаснуудыг Орост чухам ямар замаар хүргэх нь тодорхойгүй байна.

128 гб багтаамжтай "iPhone 16" утасны үнэ 1225 ам.доллараас эхэлнэ. Өөрөөр хэлбэл, АНУ-д зарагдаж буй үнээс даруй 400 гаруй ам.доллараар илүү үнэтэй байх юм. Харин 1 тб багтаамжтай "iPhone Pro Max" утас АНУ-д 1599 ам.доллараар зарагдаж байгаа бол Оросын хэрэглэгчид 2710 ам.доллараар урьдчилан захиалах боломжтой байна.

Эдгээр нь "M.Video-Eldorado"-гийн зарласан үнэ юм. "MTS"-йн хувьд илүү өндөр үнээр борлуулах төлөвтэй байна. Мөн урьдчилсан захиалга өгөхийн тулд 25 мянган рублийн барьцаа байршуулах шаардлагатай ажээ.

Эх сурвалж: REUTERS