Элчин сайдын өргөөнд Япон Улсаас Монгол Улсад суугаа Онц бөгөөд Бүрэн эрхт Элчин сайдын өргөмжлөл гардуулах ёслолын арга хэмжээ 2024 оны есдүгээр сарын 18-ны өдөр зохион байгуулагдав. Уг өргөмжлөлийг Япон, Монгол хоёр орны харилцааг өргөжүүлэн хөгжүүлэхэд үнэтэй хувь нэмэр оруулсан хувь хүн болон байгууллагад олгодог бөгөөд энэ удаа дараах гурван эрхэм хүнд энэхүү өргөмжлөлийг хүртээжээ.

Д.Дуламсүрэн багш 27 жилийн турш Өвөрхангай аймгийн Мэргэд сургуулийн япон хэлний багшаар ажиллаж ирсэн. Улаанбаатар хотоос 480 км зайд байрлах орон нутгийн улсын сургуульд хайр, чин хүсэл тээн япон хэлийг зааж ирсэн бөгөөд олон чадварлаг шавь нарыг төрүүлжээ. Мөн цаг үетэйгээ нийцсэн шинэ сургалтын арга зүйг үргэлж эрэлхийлэн судалж, орон нутаг дахь үлгэр жишээ япон хэлний багшийн хувьд залуу багш нарт зөвлөгөө өгөх үйл ажиллагааг ч мөн явуулж байна.

С.Өлзийтогтох нь 2013 онд Улаанбаатар хотын Чингэлтэй дүүрэгт хүүхдүүд сэтгэл амар тоглох цэцэрлэгт хүрээлэнг тохижуулжээ. Мөн тус нутаг дэвсгэрт Дэлхийн 2-р дайны дараа олзлогдсон япон иргэд Улаанбаатар хотын барилгуудыг барих чулуу олборлох хүнд хүчир ажил хийлгэж байсан газар гэж сонсоод бага багаар үүнтэй холбоотой түүхэн материал цуглуулсаар 2022 онд музей байгуулсан билээ. Япон, Монгол хүн төдийгүй бусад орны хүмүүс дайны түүхийг мэдэж, дэлхийн энх тайвны төлөө залбирах газар хэмээн энэ музейг зорин ирдэг.

Зохиолч, зураач Н.Эрдэнэбаяр 2015 онд нүүдэлчдийн соёл, зан заншлыг харуулсан “Бумбардай” зурган номоороо Японы ГХЯ-ны “Олон улсын МАНГА шагнал”-ын тэргүүн байрын шагналыг хүртсэн билээ. Тэрбээр Монголын шилдэг анимэ, манга, дүрийн дизайнер гэдгээрээ олны танил.  Сүүлийн жилүүдэд Монголын анимэйшны холбоог үүсгэн байгуулж, залуу манга зураачид, анимэ бүтээгчдийн хөгжилд анхаарлаа хандуулж байна. Японы соёлын талаарх гүн мэдлэгтэй тэрбээр Япон соёлыг Монголд танилцуулахын зэрэгцээ Монгол соёлыг Японд танилцуулах соёлын элчийн хувьд ч мөн адил идэвхтэй үйл ажиллагаа явуулдаг аж.