Улаанбаатар хотын авто машины түгжрэл, агаарын бохирдлыг бууруулах олон ажлыг үе үеийн хотын удирдлагууд санаачилдаг ч хийж хэрэгжүүлдэг нь тун ховор. Ямартай ч гэр хорооллын газрыг чөлөөлж орон сууцжуулснаар утаа багасаж агаарын бохирдол буурна гэж тооцоолж буй. Тиймээс өнгөрсөн оны арванхоёрдугаар сард “Улаанбаатар хотын замын хөдөлгөөний түгжрэлийг бууруулах, гэр хорооллыг сууцжуулах тухай хууль” баталсан. Орон сууцны хорооллоо дагаад дэд төвүүдийг бий болгосноор замын хөдөлгөөний түгжрэл ч мөн буурна гэж төлөвлөжээ. Энэ хүрээнд,

Iурван дүүргийн 15 хороог орон сууцжуулах байршлаар сонгон баталсан байна.

Тодруулбал, Сүхбаатар дүүргийн 12,13 дугаар хороо, Чингэлтэй дүүргийн 11,12,13,14,15,16,18,22 дугаар хорооны нутаг дэвсгэрт 733 га талбайг, мөн Сүхбаатар дүүргийн 15,17 дугаар хорооны нутаг дэвсгэр Дамбадаржаа дэд төв орчимд 71.8 га талбайд, Сонгинохайрхан дүүргийн 1,2,34 дүгээр хорооны нутаг дэвсгэрт, Толгойт дэд төв орчмын 133.3 га талбайн гэр хорооллын газрыг орон сууцжуулах байршлаар батлаад байгаа аж. Хотын төвөөр байшин барилга барих зай талбай үнэндээ байхгүй. Тиймдээ ч гэр хорооллын газруудыг чөлөөлж орон сууцны хотхон байгуулах ажлыг хэрэгжүүлж эхэлж буй. Эхний ээлжид Сэлбэ дэд төвийг дахин төлөвлөх, орон сууцжуулах ажил үргэлжилж байна. Тус ажлын хүрээнд Сүхбаатар дүүргийн 14, Чингэлтэй дүүргийн 14, 18 дугаар хорооны гэр хорооллын 158 га газрыг чөлөөлөөд байгаа юм.

Тэгвэл ирэх аравдугаар сард дээрх чөлөөлсөн 158 га газарт 12 мянган айлын орон сууц барих гүйцэтгэгч компанийг сонгон шалгаруулах тендер зарлахаар болжээ.

Тендерийн сонгон шалгаруулалтыг энэ ондоо багтаан дуусгах төлөвлөгөөтэй байгаа гэж хотын дарга  мэдэгдэв. Энэ мэтчилэн цаашид Чингэлтэй, Хайлааст, Таван буудал, Дарь-Эх, Дамбадаржаа орчмын айлуудын газрыг байраар солих хэлэлцээр хийх аж. Ингэж гэр хорооллын газрыг чөлөөлснөөр орон сууц барих газрын нөөц бүрдэнэ гэж тооцоолжээ. “Сэлбэ дэд төв”-ийн бүтээн байгуулалт дуусаж хот болсноор дотоодын нийт бүтээгдэхүүн 2.5 их наяд төгрөгөөр нэмэгдэж, 25,295 ажлын байр бий болно. Агаарын бохирдол 22 хувь, авто замын түгжрэл 36.3 хувиар буурах тооцоолол гаргасан байна.