Ираны хакерууд Бүгд найрамдах намын нэр дэвшигч Дональд Трампийн сонгуулийн кампанит багаас мэдээлэл хулгайлж, ерөнхийлөгч Жо Байдены сонгуулийн багт илгээсэн гэж АНУ-ын тагнуулын агентлагууд мэдээллээ. Энэ нь ерөнхийлөгчийн сонгуульд Иран хөндлөнгөөс оролцох гэсэн оролдлого гэж шинжээчид үзэж байна. Холбооны мөрдөх товчоо, Үндэсний тагнуулын газрын даргын алба, Кибер аюулгүй байдал болон Дэд бүтцийн аюулгүй байдлын агентлаг Лхагва гаригт хамтарсан мэдэгдэл гаргаж,  "Ираны сонгуульд нөлөөлөх хүчин чармайлт нэмэгдсэн" гэв.

Тодруулбал, Ираны кибер халдагчид зургадугаар сарын сүүл, долдугаар сарын эхээр ерөнхийлөгч асан Трампийн сонгуулийн кампанит ажлын талаар олон нийтэд мэдээлдэггүй нууц мэдээллийг цахимаар хулгайлсан. Дараа нь уг мэдээллээ ерөнхийлөгч Байдены сонгуулийн кампанит ажилтануудад илгээсэн байна. Ерөнхийлөгчийн кампанит баг Ираны талтай ямар ч холбоогүй бөгөөд Трампийн нууц мэдээллийг ашиглах сонирхол агуулаагүй гэж мэдэгдсэн байна.

Ираны хакерууд хулгайлсан материалаа АНУ-ын хэвлэл мэдээллийн байгууллагуудад мөн адил илгээсэн байсан гэж Холбооны мөрдөх товчоо нэмж тэмдэглэсэн бөгөөд Байденыг ерөнхийлөгчийн сонгуульд нэр дэвшихгүй байх шийдвэр гаргахаас өмнө энэ явдал болжээ.

Эх сурвалж: NKH