Ливан дахь Хезболлагийн гишүүдийн гар утасны пейжер дэлбэрснээр 12 хүн нас барж, 2800 орчим хүн шархадсан билээ. Эдгээр нь Унгарын Будапештэд төвтэй "Bac Consulting KFT" компанид үйлдвэрлэж, борлуулсан пейжер байсныг Тайвань мэдэгдэв. "Bac Consulting KFT" компани Тайванийн "Gold Apollo" компанийн барааны тэмдэгийг гурван жилийн лицензийн гэрээний дагуу эзэмшиж байжээ.

Тайванийн "Gold Apollo" компанийн мэдэгдэлд "Манай брэндийн барааны тэмдгийг тусгайлсан бүс нутагт бүтээгдэхүүн борлуулах зорилгоор ашиглахыг зөвшөөрч байгаа боловч бүтээгдэхүүний загвар, үйлдвэрлэл нь зөвхөн Унгарын компанийн үүрэг хариуцлага юм. Ливанд дэлбэрсэн пейжерүүдийн загварыг Унгарын компани үйлдвэрлэж, худалдсан гэдгийг бид тодорхой болгож байна. Тэдгээр төхөөрөмжийн дотор манай үйлдвэрт үйлдвэрлэсэн эд анги огт байхгүй. Манайд үйлдвэрлэдэг загваруудаас тэс өөр бөгөөд тусдаа чип ашигласан байна" гэжээ.

"Gold Apollo" болон "Bac Consulting KFT"-ын хамтын ажиллагаа гурван жилийн өмнөөс эхэлжээ. Гэхдээ Унгарын компанийн мөнгөн шилжүүлэг нэг л хачирхалтай байсныг "Gold Apollo" мэдэгджээ. Тодруулбал, "Bac Consulting KFT" компани мөнгөө Ойрхи Дорнодын нэгэн банкны данснаас шилжүүлсэн байна. Тухайн данс нь Тайванийн банкны блоконд дор хаяж нэг удаа орж байсан аж.

"Bac Consulting KFT" компанийн гүйцэтгэх захирал нь Кристиана Барсони-Арсидиаконо юм. Түүний хувийн цахим хаягийг харвал Европын комисс, ЮНЕСКО, Олон улсын атомын энергийн агентлаг зэрэг байгууллагад албан тушаал хашиж байжээ. Унгарын ерөнхий сайд Виктор Орбаны хэвлэлийн албанаас мэдээлснээр "Bac Consulting KFT" нь Унгарт үйлдвэр болон үйл ажиллагаа эрхэлдэг байргүй аж.

Эх сурвалж: CBS