ОХУ-ын ерөнхийлөгч Владимир Путин барууны хөдөө аж ахуйн импортын бүтээгдэхүүнийг хориглох тушаалаа үргэлжлүүлэх болсон байна. Тодруулбал, анх 2014 онд барууны орнуудаас хүнс, хөдөө аж ахуйн бүтээгдэхүүнийг хориглож байжээ. Уг хориг 2025 оны нэгдүгээр сард дуусах байсан ч 2026 оны арванхоёрдугаар сарын 31 хүртэл сунгасан байна.

Өмнө нь жил бүр Путин тус хоригийг сунгадаг байсан ч энэ удаа хоёр жилээр сунгалаа.

ОХУ 2014 оны наймдугаар сарын 7-нд АНУ, ЕХ, Австрали, Норвеги, Канадын бүтээгдэхүүнд хориг тавьж байсан. Гэсэн хэдий ч сүүлийн жилүүдэд барууны улсаас ирэх таагүй хандлагаас болж хоригт орсон орнуудын тоо нэмэгдсэн юм. Шинжээчдийн үзэж буйгаар, ОХУ найрсаг харилцаатай орнуудаас хүнсний импортоо нэмэгдүүлнэ.

Монгол Улсын хувьд 2022 оны байдлаар тус улсад 4.04 сая ам.доллар бүхий адууны мах, 535 мянган ам.доллар бүхий согтууруулах ундаа, 316 мянган ам.доллар бүхий малын тэжээл, 230 мянган ам.доллар хүрэх цай, 485 мянган ам.долларын хүнсний бүтээгдэхүүн экспортолжээ. Мөн онд 290 мянган ам.долларын бусад мах,  190 мянган ам.долларын ус, ундаа экспортолж байсан. Хамгийн том экспортын хувьд 46.5 сая ам.доллар бүхий жоншны экспорт юм.

Тиймээс ирэх жилүүдэд ОХУ Монгол, Казахстан, Беларусь, Хятад зэрэг орнуудаас импортын бараа бүтээгдэхүүнээ нэмэгдүүлэх төлөвтэй байна.

Эх сурвалж: TASS, OEC