Украины арми Оросын нутаг дэвсгэрийн гүн дэх томоохон зэвсгийн агуулах руу дроноор халджээ. Халдлагын улмаас гал гарч, олон оршин суугчийг нүүлгэн шилжүүлэхэд хүрсэн байна. Халдлагын дараах галын улмаас эргэн тойрны зургаан км талбай шатсан гэв. Дор хаяж 13 хүн гэмтэж бэртсэнийг ОХУ-ын Эрүүл мэндийн яам мэдэгдлээ.

Тус агуулах нь Москвагаас баруун хойд зүгт 380 орчим км зайд орших Тверь мужийн Торопецэд байрлах агуулах байжээ. Мөн тус агуулах нь Украины хилээс 500 км зайд байдаг. Агуулах байрладаг Торопецэд 11 мянга орчим хүн аж төрдөг.

Албаны хүний мэдээлснээр тус агуулахад Искандер пуужин, Точка-У пуужин, тэсрэх бөмбөг, их бууны сумууд байжээ. Түүнчлэн Хойд Солонгосоос илгээсэн "KN-23" богино тусгалын баллистик пуужин, дотоодын үйлдвэрийн 100 гаруй тэсэрдэг дрон байсан гэв.

Уг халдлагыг Украины Аюулгүй байдлын алба, Тагнуулын болон Тусгай ажиллагааны хүчнийхэн үйлдсэн гэж нэрээ нууцалсан эх сурвалж мэдээлжээ.

Барууны орнуудаас Украинд нийлүүлж буй зэвсгийг Оросын нутаг дэвсгэрийн гүнд ашиглах зөвшөөрлийг Зеленский хүсч буй. Гэвч барууны зарим орон сөргөлдөөнд татагдан орох вий гэсэн болгоомжлолын үүднээс татгалзаж байна. Украины арми Оросын нутаг дэвсгэрийн гүн дэх цэргийн техник, сум хэрэгсэл, дэд бүтцийг онилж, дайны үр дагаврыг мэдрүүлэхийг зорьж байгаа аж.

Эх сурвалж: AP