Питоны дайралтад өртсөн эмэгтэйг хоёр цагийн дараа аварчээ

Тайландын Самут Пракан мужид нэгэн эмэгтэй 20кг жинтэй, дөрвөн метрийн урт питон могойны дайралтаас амьд гарсан байна. Тодруулбал, 64 настай Аром Арунрож оройн 20:30 цагийн үед гэртээ угаалга хийж байхад нь нэг зүйл хөлийг нь хазжээ. Тэрбээр могойноос зугтах гэж оролдсон боловч удаа дараа хазуулсан. Мөн тухайн могой эмэгтэйг ороож, идэх гэж оролдсон байна. Аром Арунрож могойнд ороогдож байсан ч тусламж хүсч орилж, тэмцэлдэж байсан бөгөөд бүтэн хоёр цагийн дараа хүмүүс түүнд тусалжээ.

Тэрбээр Тайландын хэвлэлд өгсөн ярилцлагадаа "Би тусламж эрж, уйлж, хашхирч байсан. Хэн ч намайг сонсоогүй" гэжээ.

Оройн 22:00 цагийн үед хөрш айлын хүн нь Аром Арунрожыг тусламж эрж байхыг сонс, аврах багийг дуудсан байна. Цагдаагийн ахлагч хошууч Анусорн Вонгмали Анусорн дуудлагыг аваад Аром Арунрожийн гэрийн хаалгыг эвдэж орсон даруйдаа аварга том могой харсан гэв. Тухайн үед Аром Арунрож аврал эрсэн хэвээр байсан ч арьс нь цайж, дуу хоолой нь сул дугарч байжээ. Энэ талаар цагдаагийн ахлах хошууч хэлэхдээ "Тэр хоёр цаг гаруй боомилогдсон байсан тул арьс нь цайрч, хөхөрч эхэлж байсан. Намайг гэрт орох үед аварга том могой мушгиралдаж байсан. " гэж тэр хэлэв.

Тухайн питон могой нь хортой биш боловч хазуулсан тохиолдолд халдварт өвчин үүсгэдэг. Мөн олзоо ороож, амьсгалыг нь боож хөнөөсний дараа иддэг байна. Цагдаагийн баг питон могойг амжилттай салгасны дараа Аром Арунрожийг яаралтай эмнэлэгт хүргэгджээ.

Тайланд улсад 2023 оны байдлаар 12 мянган хүн хортой могойнд хазуулсан байна. Үүний 26 нь нас барсан гэж тус улсын Эрүүл мэндийн яам мэдэгдсэн байдаг.

Энэ жилийн хувьд нийтийн эзэмшлийн талбай, байшинд питон могой орж ирэх тохиолдол нэмэгдсэн. Тухайлбал өнгөрсөн сард Самут Пракан мужид нэг эрэгтэй байшингийнхаа хоёр давхрын ариун цэврийн өрөөндөө бие засаж байхад нь суултуураас питон могой гарч ирж, төмсгийг нь хазжээ.

Эх сурвалж: GUARDIAN