Эрчим хүчний салбарт үнэ тарифыг нэмж, алдагдлыг нөхөх шийдвэр гаргаж, судалгааны ажлын хэсгүүдийг ч гаргаад буй. Тэгвэл өчигдөр Засгийн газрын хуралдааны дараагаар Шадар сайд Т.Доржханд дараах тайлбар мэдээллийг өглөө.

Тэрбээр, эрчим хүчний үнэ нэмэх асуудлыг судалж байгаа. Энэ салбарт реформ хийнэ гэдгээ зарласан. Зөвхөн үнийн судалгаанаас гадна өөрчлөлт, шинэчлэлт хийх ажлууд их байгаа учир олон ажлын хэсэг гарсан. Эрчим хүчний шинэчлэлт гэдэгт зөвхөн үнэ тариф орохгүй. Үнэ гэдэг маш жижиг асуудал. Монгол Улс эрчим хүч импортлогч үндэстэн. Асар их нөөц рүү орохын тулд эрчим хүчний салбарт либерчлал хийх шаардлагатай. Эрчим хүчний компаниудын үр ашгийг хэрхэн нэмж, яаж нээлттэй зөв засаглалтай болгох вэ? Мөн цааш экспортлохын тулд зах зээлийн орчныг хэрхэн бий болгох, гадаадын хөрөнгө оруулалтыг яаж авч ирэх вэ? гээд цогц ажил.

Цогц шинэчлэлт хийхийн тулд олон төрлийн судалгааг хийж, нэгтгэх хэрэгтэй.

Ирэх арваннэгдүгээр сарын 1 гэхэд бид эрчим хүчний салбарт ямар өөрчлөлт хийж болох вэ гэдгийг судалж, тооцоолж үр дүн, нөлөөллийн үзүүлэлтийг бүгдийг судалж шийдвэр гаргана гэсэн юм.

ҮНИЙГ НЭМНЭ, ГЭХДЭЭ ХЭДЭН ХУВИАР ГЭДЭГ НЬ ЭЦЭСЛЭЭГҮЙ

Эрчим хүчний салбар 357 тэрбум төгрөгийн алдагдалтай ажиллаж байгаа талаар салбарынхан мэдээлсэн. Тиймээс энэ өвлөөс буюу ирэх арваннэгдүгээр сарын 1-нээс тогны мөнгийг нэмж алдагдал хаах шийдвэр гаргаад буй. Энэ талаар тус салбарынхан болоод эдийн засагчдын хувьд үнийфг чөлөөлж, тодорхой хувиар нэмэх нь зөв. Гэхдээ нэмэх үндэслэл, алдагдалд арилах тооцоо, судалгаагаа нийтэд танилцуулах хэрэгтэй гэсэн юм.

Харин салбар яам болоод судалгааны ажлын хэсгээс үнийг хэдэн хувиар нэмэх эцсийн хувилбараа гаргаагүй бөгөөд одоогоор 30 хувь гэдэг санал яригдаж байгаа аж.

Цахилгааны үнийг найман цент болгож нэмнэ гэдэг нь нэг кВт цагийн үнэ 270 төгрөг болно. Үнэ нэмээд асуудал шууд шийдэгдэхгүй. Тиймдээ ч энэ өвөл 30 хувиар нэмсэн бол ирэх жилүүдэд ч мөн алдагдалд нөхөхийн тулд үнэд дахин өөрчлөлт орж магадгүй. Тиймээс иргэдийн зүгээс цахилгааны үнэ нэмэх болсон шалтгаан, нэмснээр үүсэх нийгэм, эдийн засгийн нөлөөллийн тооцоо судалгааг ил болгох хэрэгтэйг шаардаж байгаа юм.

Шадар сайдын хувьд эрчим хүчний үнийг нэмнэ. Гэхдээ хэдэн хувиар гэдгийг эцэслээгүй гэдгийг өчигдөр хэлсэн. Ямартай ч сарын дараа тус салбарт ямар реформ хийх нь тодорхой болох нь.