Хотын дарга Х.Нямбаатар зам засварын ажилтай холбоотой мэдээллийг өөрийн цахим хуудсаараа дамжуулан өглөө. Тэрбээр "Улаанбаатар хот жилд дунджаар 15-16 км зам засч, шинэчилдэг байсан бол энэ жил 162 км замаа нэг дор засч, шинэчлэхээр төлөвлөсөн. Яагаад энэ жил 10 дахин урт зам засч, шинэчилж байна вэ гэхээр бонд гаргаж, нийслэлийнхээ замыг бүхэлд нь шинэчилж, тээврийн хэрэгслийн зорчилтыг нэмэгдүүлье гэж төлөвлөсөн. Өөрөөр хэлбэл, ирэх 2025 оны эхний хагас жилийн байдлаар хотод нэг ч ширхэг хагархай замгүй болсон байх ёстой. Зарим иргэд "Өдөр алдаж шөнө" гэдэг шиг хичээл сургуультай давхцаж, замаа засдаг юм бэ гэж шүүмжилдэг. Бид 2024 оны зургадугаар сард бонд гаргах эрхээ авч, зураг төсвөө батлуулж, тендер зарласан. Үүнээс өмнө мөнгө байгаагүй ээ. Эхний тендер долдугаар сарын 28-нд шалгарч, дараа дараагийн тендерүүд шалгарч байна.

Бидний зүгээс замын технологийн горим алдахгүй, хөрсөн дээр тэг хэм хүрч хүйтрэхээс өмнө замын ажлаа дуусгахаар төлөвлөж байна.

Хоёр хоногийн дараа Баянбүрдээс 32-ын тойрог хүртэлх замыг нээнэ. Мөн Яармагийн замыг ойрын үед хэсэгчилж хаана. Өнгөрсөн жил замын цас, халтиргаа гулгаа арилсны дараа хотын бүх зам хагарч, эвдэрсэн байсан. Сүүлийн 10 гаруй жилийн хугацаанд зам засварын ажлыг дорвитой хийгээгүй ээ. Үүнтэй холбоотойгоор түгжрэлийн эрчим улам нэмэгдэж байна. Бид нийт төлөвлөсөн замынхаа 70 орчим хувийг хийхээр төлөвлөсөн. Ирэх жилүүдэд хийх замын ажлынхаа тендер сонгон шалгаруулалтыг өвөл хийнэ. Тухайлбал, Сэлбэ Сэлхийн зам, Гахайн байрны зам, Офицерын зам, Нарны зам, Энхтайвны өргөн чөлөө, Таван шарын уулзвараас Баянхошуу хүртэлх зам гэх мэт олон зам засварын ажлыг хийж, 2025 оны зургадугаар сарын 1-н гэхэд нийслэлийн одоогийн нэгдүгээр түвшний бүх замыг шинэчилнэ. Ирэх онд нийслэлд хоёрдугаар түвшний буюу тойрог хурдны замын тендерийг зарлана. Иргэд маань зам засварын ажилд хүлээцтэй хандаарай" гэв.