Сэлбэ дэд төвийг түшиглэн 20 минутын хот байгуулах Засгийн газрын концепци ажил хэрэг болох эсэхийг шийдэх хариуцлагатай сонгууль тун удахгүй болно.

Агаар, хөрсний бохирдол, түгжрэлийг бууруулах зорилгоор нийслэлийн хэмжээнд зургаан дэд төвийг түшиглэн 20 минутын хот байгуулах шийдвэр гаргаснаас  хамгийн далайцтай эрчтэй яваа нь Сэлбэ дэд төв төсөл юм.

Төслийн хүрээнд Сүхбаатар дүүргийн 14, Чингэлтэй дүүргийн 14, 18 дугаар хорооны 2200 нэгж талбарыг чөлөөлж, 12 мянган өрхийн орон сууц барихаар төлөвлөсөн. Одоогоор 1300 гаруй айл газраа чөлөөлснөөр нөхөх олговор аваад буй.

Гэр хорооллын иргэдийн хувьд газар нь хамгийн үнэтэй капитал. Тиймээс ч төсөл хэрэгжүүлэгчид иргэдийг аль болох хохироохгүй байх зарчим баримтлан газрыг нь үнэлсэн байдаг. Түүний хүчинд газар чөлөөлөлт амжилттай болсон гэж хэлж болно. Одоо гол нь барилгажуулах ажил цаг алдалгүй үргэлжлэх ёстой. Үүнийг үргэлжлүүлэн хийж чадах баг бол Чингэлтэй дүүргээс Нийслэлийн иргэдийн төлөөлөгчдийн хуралд өрсөлдөх Засаг дарга Б.Мөнхбатаар удирдуулсан баг гэж хэлж болно.

Чингэлтэй дүүргийн Засаг дарга Б.Мөнхбатын хувьд Сэлбэ дэд төвийг байгуулах ажил цаасан дээр бичигдэхээс эхлээд газар шорооных нь ажил өрнөх үеэс гар бие оролцож, өнгөрсөн хугацаанд уйгагүй ажилласан нэгэн.  Нэг ёсны Сэлбэ дэд төвийг түшиглэсэн 20 минутын хот байгуулах ажлын эхлэлийг тавилцсан хүмүүсийн нэг гэж хэлж болно.

Нийслэлийн Засаг даргын Эдийн засгийн хөгжил, дэд бүтцийн асуудал хариуцсан нэгдүгээр орлогч Н.Мандуулын хувьд олон улсын хөрөнгийн зах зээлээс 500 хүртэлх сая ам.долларын бонд босгох даалгавар аван ажиллаж буй. Уг бондын мөнгөөр Сэлбэ дэд төвийг санхүүжүүлж, 20 минутын хот босгоно.

Нийслэл өнгөрсөн хавар дотооддоо 500 тэрбум төгрөгийн бондыг амжилттай гаргаж чадсан. Түүний үр дүнд бондынхоо 300 тэрбумыг нь Бөөрөлжүүтийн цахилгаан станцыг байгуулахад дутагдаад байсан хөрөнгийг бүрэн шийдвэрлэсэн.

Тун удахгүй тус станцын эхний хэсэг ашиглалтад орно. Түүний хүчээр Монгол Улсын эрчим хүчний эх үүсвэр 150 мвт-аар нэмэгдэнэ. Мөн 200 тэрбум бондын 150 тэрбумыг зам засварт зарцуулж байгаа бол 50 тэрбумыг нь шинэ төв цэвэрлэх байгууламжийг барихад шаардагдаж байсан ажлыг санхүүжүүлсэн. Нийслэлд ирээд удаагүй ч олон ажил амжуулж, улаанбаатарчууд цахилгаангүй болох эрсдлийг бууруулж чадсан төдийгүй шинэ төв цэвэрлэх байгууламж ашиглалтад орох бололцоог бүрдүүлсэн. Тэрбээр нийслэлд ирэхээсээ өмнө Хөгжлийн банкийг удирдан ажиллах үеэрээ дампуурах эрсдэлээс аварч байв.

Арав гаруй жилийн өмнөөс Чингэлтэй дүүргийн хорооны Засаг даргаас ажлаа эхлүүлж байсан Л.Ариунтуяагийн хувьд мөн л Сэлбэ дэд төв төслийг эхлүүлэхэд оролцсон хүмүүсийн нэг гэж хэлж болно. Хэн хүний анзаараагүй зүйлийг гярхай олж харна, иргэдтэйгээ тулж ажиллан, ямар ажлыг аль хороонд хийх шаардлагатайг хамгийн сайн мэдэж, түүнийхээ төлөө тууштай хөөцөлдөж олон ч сургууль, цэцэрлэг бариулсан байдаг.

Нийслэлийн иргэдийн төлөөлөгчдийн хуралд чингэлтэйчүүдээ төлөөлж ажиллаж байгаа З.Төмөртөмөөгийн хувьд “20 минутын хот” төслийг Сэлбэ дэд төвд хэрэгжүүлэхийн төлөө дээгүүр доогуур мөн ч их лобби хийж, ар тал нь болж ажилласан нэгэн.

Нэг үгээр хэлбэл, чингэлтэйчүүдээ төлөөлөн Нийслэлийн иргэдийн төлөөлөгчдийн хуралд нэр дэвших тус багийн хувьд Сэлбэ дэд төвийг түшиглэн 20 минутын хотыг байгуулахад ачаа үүрээд автор нь болоод ажиллах туршлага хуримтлуулсан нэр дэвшигчид гэж хэлж болно.

Улаанбаатар хотын захирагч Х.Нямбаатар “Сэлбэ дэд төвийг түшиглэн босох 20 минутын хот нь III, IV хорооллоос ч том байх болно” гэдгийг мэдэгдэж байв. Эндээс ямархуу цар хүрээтэй бүтээн байгуулалтын ажил хүлээгдэж байгаа вэ гэдэг нь тодорно.

Мөн энэхүү Сэлбэ дэд төвийг түшиглэн босох 20 минутын хот нь жишиг болох учиртай. Сургууль, цэцэрлэг, эмнэлэг, хороо, дүүрэгтээ хүрч үйлчилгээ авахад иргэд цаг алдахгүй. Ердөө 20 минутад багтаан төрийн үйлчилгээндээ хүрч авдаг байхаар төлөвлөсөн.  Үзвэр үйлчилгээнээс эхлээд худалдаа үйлчилгээний төвүүд ч 20 минутын хот дотор байгуулагдана. Мөн бүтээн байгуулалтын ажлын 60 хувь нь барилга байгууламж бол 40 хувь нь ногоон байгууламжаас бүрдэнэ.

Сүүлийн жилүүдэд барилгын компаниуд орон сууцыг олноор сүндэрлүүлсэн ч сургууль, цэцэрлэгийг дэргэд нь бариагүйгээс асуудал дагуулах болсон. Түгжрэлийн нэг том шалтгаан нь орон сууцныхаа дэргэд сургууль, цэцэрлэгийг төлөвлөөгүйгээс болсон гэх судалгаа ч гарч буй. Харин Сэлбэ дэд төвийг түшиглэн босох 20 минутын хот нь энэ бүх алдааг зассан байхаараа онцлогтой.

Г.ХОРОЛ