ОХУ олон улсын хориг арга хэмжээнээс зайлсхийхийн тулд Хятад руу их хэмжээний баяжуулсан уран илгээж байж болзошгүйд АНУ санаа зовж байна. Орос бол баяжуулсан уран буюу цацраг идэвхт металын хамгийн том экспортлогч юм. Тус улсаас Хятад руу экспортолсон ураны хэмжээ 2022, 2023 онд өссөнийг Дэлхийн банкнаас гаргасан тоо баримтаас харж болно.

Хятад улс Оросоос авсан уранаа АНУ руу нийлүүлсэн эсэхийг Вашингтон өдгөө шалгаж байна. Украин дахь дайны дараа АНУ-ын Конгресс Оросоос метал импортлохыг хориглох шийдвэр гаргасан. Энэ шийдвэрийн дараа Хятад улс их хэмжээний баяжуулсан ураныг АНУ руу нийлүүлж эхэлжээ.

"Хятад улс дэлхийн баяжуулсан ураны зах зээлд илүү их үүрэг гүйцэтгэхийг эрмэлзэж байгаа. Энэ нөхцөлд Оросоос авах импортын хэмжээ нэмэгдэж байгаа нь тэдний амбицыг биелүүлэхэд түлхэц болно" гэж Лондонд төвтэй Хатан хааны нэгдсэн үйлчилгээний хүрээлэнгийн тайланд дурджээ.

Эх сурвалж: THE TELEGRAPH