Б.Баттөгсөөс допинг илэрсэн ч паралимпод оролцохоор Парисыг зорьжээ

Парисын паралимпоос Монголын баг тамирчид нэг алт, гурван мөнгөн медаль хүртэж, бахдам амжилтыг үзүүлсэн. Гэвч сайны хажуугаар саар зүйл тохиосон аж. Тодруулбал, пара жүдо бөхийн төрөлд өрсөлдөх байсан Б.Баттөгс нь паралимп эхлэхээс өмнө допингийн шинжилгээнд бүдэрсэн ч наадамд барилдахаар Парис хотыг зорьсон гэнэ. Улмаар түүнийг бэртлийн улмаас барилдах боломжгүй болсон гэж албаныхан мэдээлсэн. Гэвч үнэн хэрэгтээ допингийн шинжилгээнд бүдэрсэн учир барилдаагүйг мэдэгдлээ. Үүгээр ч зогсохгүй түүнийг тамирчдын хотхоноос гаргаж, ноцтой зөрчлийг арилгасан гэв.

Монголын үндэсний допингийн эсрэг байгууллагын мэдэгдэлд "Парис-2024 олимпод оролцох эрх авсан бүх тамирчдаас допингийн шинжилгээг 1-3 удаа авч Дэлхийн допингийн эсрэг агентлагийн итгэмжлэгдсэн лабораторид илгээн шинжлүүлсэн.

Хөтөлбөрийг хэрэгжүүлэх ажлын хүрээнд тамирчнаас авсан допингийн шинжилгээний хариу гарахад паралимпийн тамирчин Б.Баттөгсөөс 2024 оны долдугаар сарын 29-ний өдөр авсан шинжилгээний сорьцоос ДДЭА-ын Хориглосон жагсаалтын S1.1 бүлэгт хамаарах Дростанолоны задралын бүтээгдэхүүн илэрсэн байна. Үүнийг бид 2024 оны наймдугаар сарын 30-ны өдөр тамирчин түүний дасгалжуулагч нарт бичгээр мэдэгдсэн.

Олон улсын болон дотоодын эрх зүйн зохицуулалтын хүрээнд допингийн шинжилгээгээр нэгэнт зөрчил илэрсэн тохиолдолд тухайн тамирчныг спортын аливаа уралдаан тэмцээнд оролцохыг хориглодог. Гэсэн хэдий ч тамирчны ахлах дасгалжуулагч, бэлтгэл хангагч нар нэгэнт допингийн шинжилгээнд бүдэрсэн тамирчныг Парис хот руу авч яван, тамирчдын хотхонд оруулж бэлтгэл сургуулилт оролцуулсан үйлдэл гаргасан байна.

Энэ үйлдэл нь сануулж анхааруулсаар байхад санаатай үйлдэгдсэн допингийн зөрчилд тооцогдох эрсдэлтэй төдийгүй Монголын пара жүдо бөхийн спортын холбоонд хариуцлага тооцох үндэслэл болдог" гэжээ.