Өмнөд Солонгосын арми цэргийн бааз орчмын 1300 гаруй хяналтын камерыг буулгажээ. Эдгээр камерыг Хятад руу дохио дамжуулахад ашиглах боломжтой гэдгийг олж мэдсэнийхээ дараа ийм шийдвэр гаргасан байна. Нэрээ нууцалсан албан тушаалтны мэдэгдсэнээр Өмнөд Солонгосын нэгэн компаниас нийлүүлсэн камерууд нь Хятадын тодорхой серверт холбогдож, бичигдсэн бичлэгийг дамжуулах чадвартай болох нь тогтоогдсон аж. Тус улсын тагнуулын агентлагууд өнгөрсөн долдугаар сард цэргийн техник хэрэгсэлд шалгалт хийх явцдаа камерууд хятад гаралтай болохыг олж илрүүлсэн байна.

Зарим камер нь Хойд Солонгостой хиллэдэг хилийн ойролцоо байсан. Оронд нь сургалтын бааз, хашаа орчимд байгаа камеруудад анхаарлаа хандуулжээ. Одоогоор ямар ч мэдээлэл алдагдаагүй гэж эх сурвалж мэдээлэв.

Одоогоор 100 орчим камерыг дотооддоо үйлдвэрлэсэн төхөөрөмжөөр солиод байна.

Хятадад үйлдвэрлэсэн ажиглалтын төхөөрөмжүүд нь аюулгүй байдлын баталгаа сул, цаашлаад Хятадын төртэй холбоотой байж магадгүй гэх болгоомжлол барууны олон оронд гараад буй. Тухайлбал, уйгурчуудын эрхийг зөрчсөн хэрэгтэй холбогдуулан АНУ 2019 онд Хятадын "Dahua" болон "Hikvision" компаниудыг хар жагсаалтад оруулсан. Үүнээс хойш нэмэлтээр долоон компанийг хоригт оруулжээ. Их Британи ч бас засгийн газрын чухал объектуудад "Hikvision" камер оруулахыг хориглосон. Мөн Австрали улс өнгөрсөн оны хоёрдугаар сард засгийн газрынхаа байрнуудаас "Hikvision", "Dahua"-ийн олон 100 бүтээгдэхүүнийг буулгажээ.

Эх сурвалж: BUSINESS INSIDER