Сэлэнгэ аймгийн Мандал сумын Түнхэл тосгонд буудалцаан болсон хэрэг өчигдөр гарсан талаар бид мэдээлсэн билээ. Энэ хэргийн талаар нэмэлт мэдээлэл авахаар бид Сэлэнгэ аймгийн Мандал сумын Засаг дарга, Б.Цээпилдоржтой холбогдлоо.

-Танай суманд буудалцаан болсон гэсэн мэдээллийг тодруулах гэсэн юм. Яг хэзээ яагаад ийм үйл явдал болов?

-Их сүр дуулиантай юм болоогүй. Энэ сарын 2-ны  өдрийн 07 цагийн үед “Пураам” алтны компанийн   текник руу том оврын буугаар буудсан хэрэг гарсан юм.

-Компанийн үйл ажиллагааг эсэргүүцсэн хүмүүс буу ашиглаж, халдсан гэж ойлгож болох уу?

-Ашиглалтын лицензээ аваад  зургаан сар болж байгаа ч одоогоор үйл ажиллагаа явуулж эхлээгүй бэлтгэл ажилдаа ороод байж байсан юм.  Би өнгөрсөн долдугаар  сарын 20-нд тус компанийн  үйл ажиллагааг шалгахад хэвийн байсан.  Хэдэн хүн, ямар учраас буу хэрэглэн, ийм үйлдэл гаргасан нь тодорхойгүй байгаа болохоор нэмэлт мэдээлэл өгөх боломж муу байна.

-Буудалцаан болсноос хойш багагүй хугацаа өнгөрлөө. Цагдаагийнхан хэн буудсаныг тогтоож, хэрэгтнийг олж илрүүлэхээр ямар бүрэлдэхүүнтэй ажиллаж байгаа бол?

-Хэрэг өчигдөр 07 цагийн үед гарсан. Харин Сэлэнгэ аймгийн төвөөс арав, манай сумын 30 гаруй цагдаа энэ өдрийн найман цагаас эхлэн эрэлд гарч, гэмт хэрэгтнийг хайж байна. Одоогоор олоогүй л байна.

-Сэжиглэж байгаа хүн бий юу?

-“Нинжа” нарыг болов уу гэж цагдаагийнхан таамаглаж байна. Учир нь тус алтны компанийн ойролцоох хөндийд “нинжа” нар алт ухдаг юм.  Намайг долдугаар сард очиход 10-аад нинжа  байсан.