Өнгөрсөн зуны Парист болсон паралимпийн наадам нийгэмд эерэг өөрчлөлтийг авчирч, пара спортуудыг сонирхох, судлах хүмүүсийн тоо олширчээ. Их Британийн "Better" компанийн судалгаа ч энэ бүгдийг хангалттай харуулав. Тус компанийн мэдээллээр тэргэнцэртэй регби, пара хөнгөн атлетик, суугаа волейбол гэх төрлүүд хамгийн их анхаарлын төвд орсон аж.

Нэгэн жишээг дурдахад, пара ширээний теннисний тамирчин 14 настай Бли Твомей гэх охин Парисын наадмаас медаль хүртсэн бөгөөд түүний талаарх интернетийн хайлт 4,468 хувиар өсчээ.

Пара хөнгөн атлетикийн талаарх хайлт 2,800 хувиар, тэргэнцэртэй регбигийн талаарх хайлт 1,626 хувиар өссөн үзүүлэлттэй.

Та бүхэнд интернет орчинд хамгийн их хайгдсан пара спортуудын мэдээллийг хүргэе.

1. Пара ширээний теннис
2. Пара хөнгөн атлетик
3. Тэргэнцэртэй регби
4. Суугаа волейбол
5. Пара дугуй
6. Пара триатлон
7. Пара бадминтон
8. Гоалбол
9. Хараагүйчүүдийн хөлбөмбөг
10. Пара усанд сэлэлт

Дээрх арван пара спортын талаарх түүх, хэрхэн тоглох, хэрхэн хөтөлбөрт нь хамрагдах зэрэг "Wikipedia"-ийн мэдээллийн хайлт 942 хувиар өсчээ.

Энэхүү тоон үзүүлэлтээс харахад Парисын паралимпийн ачаар пара спортын талаарх ойлголт, мэдээлэл дэлхий дахинд түгэн дэлгэрчээ. Монгол Улсад л гэхэд анх удаагаа цэнхэр дэлгэцээр шууд дамжуулж, нийгэмд эерэг өөрчлөлтийг авчирсан. Магадгүй ирэх 2028 оны Лос Анжелесын олимпод Монголын баг тамирчдын тоо өсч, илүү олон медаль хүртэхийг үгүйсгэхгүй.