ОХУ-ын армийг 180 мянган цэргээр нэмэгдүүлж, нийт идэвхтэй алба хаагчдын тоог 1.5 сая хүргэх зарлигийг ерөнхийлөгч Путин Даваа гаригт мэдэгдлээ. Зарлигт дурдсанаар Путин зэвсэгт хүчний нийт бие бүрэлдэхүүний тоог 2.38 сая болгон нэмэгдүүлэхийг тушаасан байна. Үүний 1.5 сая нь цэргийн жинхэнэ алба хаагч байна.

Ингэснээр Орос улс АНУ, Энэтхэгийг гүйцэж, Хятадын дараа хоёрдугаарт орох том армитай болно гэдгийг Олон улсын стратегийн судалгааны хүрээлэн мэдэгдлээ. Тус байгууллагын мэдэгдсэнээр Хятадад хоёр сая гаруй идэвхтэй алба хаагч байдаг.

Путин 2022 оны хоёрдугаар сард Украинд цэрэг илгээснээсээ хойш гурав дахь удаагаа армиа тэлж буй нь энэ юм. Энэ удаагийн шийдвэр нь зүүн Украин дахь фронтын шугамд урагшлах, Курск мужаас украин цэргүүдийг хөөн гаргах хүчин чармайлттай холбоотой. ОХУ-ын парламентын доод танхимын Батлан ​​хамгаалах хорооны дарга Андрей Картаполовын хэлснээр идэвхтэй алба хаагчдын тоог нэмэгдүүлэх нь зэвсэгт хүчнийг үе шаттайгаар шинэчлэх төлөвлөгөөний нэг хэсэг юм. "Оростой хиллэдэг Финланд улс НАТО-д элссэн учир нутгийн баруун хойд хэсэгт аюулгүй байдлыг хангахын тулд шинэ бүтэц, цэргийн ангиудыг бүрдүүлэх шаардлагатай болсон" гэж тэр мэдэгджээ.

Хүн амын хувьд ОХУ нь Украинаас гурав дахин илүү. Мөн сайн дурынхныг армидаа амжилттайгаар элсүүлж байгаа ч гэлээ дайны талбарт их хэмжээний хохирол амссаар байна. Дайн дуусах төлөв байдал харагдахгүй байгаа тул ийнхүү цэргийн алба хаагчийн тоог нэмэгдүүлэх зарлиг гаргажээ.

Дээр дурдсанчлан, Путин 2022 оноос хойш байлдааны цэргийн тоог албан ёсоор хоёр удаа буюу 137, 170 мянгаар тус тус нэмэгдүүлэх шийдвэр гаргасан. Түүнчлэн энэ хугацаанд 300 мянга гаруй цэрэг нэмэлтээр дайчилсан. Дахин дайчилгаа зарлах төлөвлөгөө одоогоор байхгүй бөгөөд оронд нь сайн дурынхныг үргэлжлүүлэн элсүүлэх төлөвтэй байна.

Эх сурвалж: REUTERS