Хотын захиргаа Яармаг руу нүүснээр Төв талбайн баруун талд байрлах Хангарьд ордон сулраад буй. Тэгвэл суларсан Хангарьд ордныг 13 тэрбум 763 сая төгрөгөөр үнэлжээ.

Зөвхөн газар нь л 13.7 тэрбумд хүрэхүйц ашигтай байрлалд байршиж буй Хангарьд ордныг 2008 онд ашиглалтад оруулж байсан түүхтэй. Өөрөөр хэлбэл, барилга нь баригдаад ердөө 10 гаруй жил болж буй. Гэтэл төрийн өмчид шилжүүлэхдээ 13.7 тэрбум төгрөгөөр тооцсон нь олон нийтийн анхаарал татаж эхлэв.

Төрийн ордны зүүн талд байрлах “Улаанбаатар таймс” сонины хэвлэх үйлдвэрийн газрыг 2015 онд дуудлага худалдаанд оруулснаар “Таван богд”-ын Ц.Баатарсайхан 23.8 тэрбумыг санал болгон,  авч байсан. Балгас болоод байсан газрыг тордсоноор, “Galleria Ulaanbaatar” нэртэй шил толь болсон барилга сүндэрлэсэн. Одоо бол их хөлийн газар болж хувирсан гэж хэлж болно.

Харамсалтай нь, төр авах болохоор үнэлгээг нь бууруулсан уу, 2018 онд Нийслэлийн өмчийн харилцааны газар захиалга өгч үнэлүүлэхэд  43 тэрбум  423.3 сая төгрөг,  2022 онд хийсэн үнэлгээгээр 79 тэрбум төгрөгөөр үнэлэгдэж байсан “Хангарьд” ордон ханш нь хэд дахин буурч, балгаснаас ч дорд үнэлэгдээд байна.

Г.ХОРОЛ