“Нарантуул” захын хойд хаалга буюу “Мангасын ам”-д цагдаагийн пост ажиллаж эхэлжээ. Угтаа энэ хаалга бол “Нарантуул” худалдааны төв рүү орж, гарах хөдөлгөөний нэг хэсэг боловч нөгөө талаар хуучин эд бараа худалдаалах наймаачдын хэсэг гэж хэлж болно. Тус газарт цагдаагийн пост барих шийдвэрийг есдүгээр сарын 7-ны өдөр Хотын дарга Х.Нямбаатар гаргасан.

Үүнтэй холбоотойгоор НЗД-ын нэгдүгээр орлогч Н.Мандуул"Цаашид Улаанбаатар хотод буй энэ мэт хэв журамгүй цэгүүдийг шат дараалан цэгцэлж, янзлах арга хэмжээ авч ажиллана. Мөн "Мангасын ам"-ны зүүн талын замын трассыг хот байгуулалтын стандартын газар баталсан байгаа. Удахгүй газар чөлөөлөлтийн ажлыг эхлүүлнэ. Энэ хавьд нийтийн эзэмшлийн талбай дээр барьж байгуулсан, хувийн аж ахуй нэгжүүдийн барилга байгууламж байгаа.

Эдгээрийг чөлөөлж, явган хүний зам болон машин замыг барьж байгуулахаар төлөвлөж байна.

Түүнчлэн дахин төлөвлөлт гэсэн нэрийдлээр ямар ч төлөвлөлтгүй баригдсан стандартын бус барилгууд бий. Үүнд шалгалт оруулсан байгаа. Тиймээс энэ хавийг ойрын хугацаанд бүрэн цэгцэлнэ" гэх мэдээллийг өгсөн.

Хуучин цагт “Мангасын ам”-ны ойролцоо орон сууц байхгүй байсан бол одоо олон барилга, байгууламж бий болсон. Тэр ч утгаараа уг шийдвэрийг оршин суугчид сайшааж байгаа. Учир нь “Мангасын ам”-ны эзэд дулааны улиралд бол эндээ бараг л амьдардаг гэж хэлж болно. Архи уусан олон хүмүүс төвлөрдөг учраас бага насны гэлтгүй насанд хүрсэн хүмүүст ч аюултай газар. Тэгэхээр ямартай ч “Мангасын ам”-ыг цэгцлэх шаардлага зайлшгүй бий. Гагцхүү иргэдийн эрхийг зөрчихгүй байх тал дээр анхаарч ажиллах шаардлагатай гэдгийг иргэд хэлж байгаа юм.