АНУ-ын ерөнхийлөгчийн сонгуульд Камала Харрис ялбал ирэх дөрвөн жил аанай л Байдены засаглал үргэлжилнэ гэдгийг Үндэсний аюулгүй байдлын зөвлөх асан Жон Болтон хэлжээ. Тэрбээр олон улсын асуудлууд болон сонгуулийн талаар яриа өгөхөөр Ням гаригт “Cats Roundtable” радио нэвтрүүлэгт орсон.

Энэ үеэр Байдены засаг захиргааг Афганистанаас цэргээ татсан гэж Болтон шүүмжилжээ. Үүнээс болоод ОХУ-ын ерөнхийлөгч Владимир Путин гэх мэт дэлхийн удирдагчид бидний сул талыг олж харсан учраас Украинд дайн эхэлсэн гэж боддогоо хэлсэн байна.

Байден өрсөлдөөнөөс нэрээ татаж, оронд нь Камала Харрис нэр дэвших болсноос хойш түүний бодлого ямар чиглэлд байх вэ гэдэг асуулт үүссэн. Орос, Украины дайн, Израиль, Хамасын мөргөлдөөнийг Харрис зохицуулж чадах уу гэж олон нийт эргэлзэж байна. Энэ талаар Болтон хэлэхдээ "Харрисын засаг захиргаа яг л Байдены дөрвөн жил шиг байна. Энэ бол хамгийн боломжит таамаглал. Мөн энэ нь биднийг сул дорой, найдваргүй гэдгийг дэлхий дахинд харуулах болно" гэжээ. Түүний үзэж буйгаар Харрис өөрийн нэрээр нэрлэх боловч Байдены засаг захиргааны ажлыг л үргэлжлүүлэхийг эрмэлзэнэ гэлээ.

Эх сурвалж: THE HILL