Борис шуурганы улмаас төв болон зүүн Европт амралтын өдрүүдэд хүчтэй аадар бороо оржээ. Улмаар Австри улсад үерлэж, аврах ажиллагааны үеэр нэг гал сөнөөгч нас барсан бол Польшид нэг хүн живж, нас баржээ. Вена хотыг тойрсон мужуудыг гамшгийн бүс гэж зарлаж, удирдагчид нь "урьд өмнө байгаагүй онцгой нөхцөл байдал" үүссэн гэв.

Румын улсад дөрвөн хүн нас барж, хоёр хүн сураггүй алга болсон бол Чехэд хэд хэдэн хүн сураггүй хэвээр байна.

Польшийн ерөнхий сайд Дональд Туск Ням гаригт нэг хүн нас барсныг баталж, иргэдийг аврагчидтай хамтран ажиллахыг уриалж байна.

Бүгд Найрамдах Чех улсад үерийн улмаас нүүлгэн шилжүүлэлт хийж, тус улсын хойд нутгийн 51,000 айл өрхийн цахилгаан тасарсан гэж эрчим хүчний "CEZ" компани мэдэгдлээ.

Нийслэл Прага хотод үерийн саад тотгор нэмэгдсэн байна. Борис шуурга Бямба гаригт Румынд хүчтэй шуурсны улмаас үер бууж, Галати мужийн зүүн өмнөд хэсэгт дөрвөн хүн амиа алдсан байна. Тус улсын ерөнхийлөгч Клаус Иоханнис хэлэхдээ, "Европ тивд улам бүр нэмэгдэж байгаа уур амьсгалын өөрчлөлтийн үр дагавар бидэнд дахин нүүрлэж байна" гэжээ.

Уур амьсгалын өөрчлөлтөөс шалтгаалж дэлхийн ихэнх улс орнуудын нэгэн адил Европт их хэмжээний хур тунадас орох магадлал нэмэгдсээр байна.

Галати мужийн Слобозия Коначи тосгоны захирагч хэлэхдээ, 700 байшин үерт автсан гэжээ. Польшийн баруун өмнөд хэсэгт орших Ополе мужийн Глуколазы хотод байдаг гол эргээсээ хальж, хотыг бүхэлд нь үерт автуулж байна гэж хотын дарга мэдэгдэв.

Тус хотын оршин суугч Зофия Овсиака хэлэхдээ, "Бүгд айсан бөгөөд бороо зогсох найдвар байхгүй бололтой" гэжээ.

Польшийн хоёр дахь том хот Краков хотын оршин суугчдад үерийн аюулаас хамгаалах элсний уутыг тараасан байна.
Чехийн хилийн ойролцоох Доод Силезийн хамгийн их хохирол амссан бүс нутгийн нэг болох Клодзкогийн 1600 хүнийг нүүлгэн шилжүүлсэн гэж Туск мэдэгдэв. Тэрбээр бусад оршин суугчдыг гэр орноо нүүлгэн шилжүүлэх үедээ онцгой байдлын албатай хамтран ажиллахыг уриалав. Тус бүсэд 17 мянган хүн цахилгаангүй байгаа бөгөөд зарим байршилд гар утасны дохио ажиллахгүй, интернэт тасарсан тул "Starlink" хиймэл дагуулыг ашиглахаар шийдсэнээ мэдэгдэв.

Эх сурвалж: BBC