Өмнөд Солонгосын ерөнхийлөгч Юн Сук Ёлын үнэлгээ 20 хувь хүртэл буурсныг Баасан гаригт танилцуулсан санал асуулга харуулжээ. Энэ нь түүний 2022 оны тавдугаар сард албан тушаалаа хүлээж авснаас хойших хамгийн бага үнэлгээ болж байна.

"Gallup Korea" агентлагийн явуулсан судалгааг харвал Юн Сук Ёлын гүйцэтгэлийн эерэг үнэлгээ өмнөх долоо хоногоос гурван хувиар буурсан бол сөрөг үнэлгээ нь бүх цаг үеийн дээд амжилт буюу 70 хувьд хүрч, өмнөх долоо хоногоос гурван хувиар өссөн байна.

Анагаахын сургуульд элсэгчдийн квотын зохицуулалт, эдийн засгийн нөхцөл байдал зэрэг нь түүнд сөрөг үнэлгээ өгөх гол шалтгаан болжээ.

Харин намын үнэлгээний хувьд эрх баригч Ардын хүч нам 28, гол сөрөг хүчин Ардчилсан нам 33, Солонгосыг сэргээн босгох нам найман хувийн үнэлгээтэй байна. Ардын хүч намын үнэлгээ өмнөх долоо хоногоос гурван хувиар буурч, Юн Сук Ёлын засаг захиргааны үеийн хамгийн доод түвшиндээ хүрчээ.

Санал асуулгыг Мягмар гаригаас Пүрэв гаригийн хооронд явуулсан бөгөөд 1002 хүн оролцсон байна.

Эх сурвалж: YONHAP