Москва дахь Их Британийн зургаан дипломатчийг тагнуул, хорлон сүйтгэх ажиллагаа явуулсан гэж буруутган, итгэмжлэлийг нь цуцаллаа. ОХУ-ын Холбооны аюулгүй байдлын алба энэ талаар Баасан гаригт мэдэгдэл хийсэн бөгөөд нотлох баримт байгаа гэжээ. Харин Их Британийн засгийн газар Оросын буруутгалыг бүрэн үндэслэлгүй гэж мэдэгдэв.

Зургаан дипломатч хэдийнэ Оросыг орхиж, оронд нь өөр хүмүүс солигджээ.

Британийн дипломатууд Оросын өсвөр насныхныг өөртөө элсүүлэн, өдөөн хатгалга зохион байгуулсан. Мөн Британийн Элчин сайдын Москва дахь байранд сөрөг хүчнийхэнтэй хэлэлцээ хийсэн гэж Холбооны аюулгүй байдлын алба мэдэгджээ. Оросын төрийн телевизээр зургаан дипломатчийн нэрийг зарлан, гэрэл зургийг нь үзүүлсэн байна.

Украины дайны асуудлаар Их Британийн ерөнхий сайд Кейр Стармер, АНУ-ын ерөнхийлөгч Жо Байден нар Вашингтонд уулзахаар төлөвлөсөн. Энэ уулзалтаас хэдхэн цагийн өмнө ОХУ дээрх мэдэгдлийг хийжээ. Хоёр улсын дипломат харилцаа түүхэн доод түвшиндээ хүрсэн гэж "Al Jazeera" агентлаг мэдээлсэн. Тухайлбал, өнгөрсөн тавдугаар сард Их Британи улс Оросын батлан ​​хамгаалахын атташег тагнуул хийсэн хэргээр хөөж байгаагаа зарласан билээ.

Эх сурвалж: AL JAZEERA