Хятад улс 1950-иад оноос хойш анх удаагаа тэтгэврийн насыг нэмэгдүүлэх болжээ. Учир нь тус улсын хүн ам хөгширч, тэтгэврийн төсөв улайхад ойртоод буй. Хууль тогтоох дээд байгууллага Баасан гаригт хуралдсаны эцэст хөх захтан буюу биеийн хүчний хөдөлмөр эрхэлдэг эмэгтэйчүүдийн тэтгэврийн насыг 50-55, цагаан захтан эмэгтэйчүүдийнхийг 55-58 болгон нэмэгдүүлэх саналыг баталлаа. Харин эрчүүдийн тэтгэврийн насыг 60-63 болгож нэмэгдүүлнэ.

Хятадын одоогийн тэтгэврийн нас нь дэлхийн дунджаас харьцангуй залууд тооцогддог.

Баасан гаригт баталсан төлөвлөгөөний дагуу өөрчлөлтийг 2025 оны нэгдүгээр сарын 1-нээс хэрэгжүүлж эхлэнэ. Ингэхдээ ирэх 15 жилийн хугацаанд хэдэн сар тутамд тэтгэврийн насыг нэмэгдүүлж явах юм. Хуульд заасан наснаас өмнө тэтгэвэрт гарахыг зөвшөөрөхгүй. Харин гурван жилээс илүүгүй хугацаагаар тэтгэврийн насаа хойшлуулж болно.

Хятадын төрийн мэдлийн Нийгмийн шинжлэх ухааны академийн 2019 онд мэдээлснээр тус улсын тэтгэврийн сан 2035 он гэхэд мөнгөгүй болно. Тэгвэл шинэ хуулийн дагуу хөдөлмөр эрхлэгчид тэтгэвэр авахын тулд 2030 оноос эхлэн нийгмийн даатгалын тогтолцоонд нэмэлт шимтгэл төлөх шаардлагатай болно. Улмаар 2039 он гэхэд тэд тэтгэврээ авахын тулд 20 жилийн шимтгэл төлөх ёстой болно.

Тэтгэврийн өөрчлөлтийн мэдэгдэлд хятадууд янз бүрийн хариу үйлдэл үзүүлж байна. "Ирэх 10 жилийн хугацаанд биднийг 80 хүрч байж тэтгэвэрт гаргах өөр хуулийн төсөл гарах болно" гэж нэгэн иргэн цахим сүлжээнд дургүйцлээ илэрхийлжээ.

Эх сурвалж: BBC