Нэр хүндтэй бизнес байгууллагуудын ивээн тэтгэдэг асрамжийн газарт байрлах 400 гаруй хүүхэд бэлгийн болон бие махбодын хүчирхийлэлд өртсөн байж болзошгүй хэргийг Малайзын эрх баригчид илрүүлжээ. Улмаар тухайн хүүхдүүдийг улсын асаргаанд шилжүүлэн авсан байна.  Цагдаагийн ерөнхий байцаагч Разарудин Хусайн хэлэхдээ "Лхагва гаригт хоёр мужийн 20 асрах байранд зохион байгуулалттай дайралт явуулсны дараа 402 хүүхдийг аварсан. Мөн шашны багш, асран хамгаалагч зэрэг 171 насанд хүрсэн хүнийг баривчилсан. Эдгээр асрах байрыг "Global Ikhwan Services and Business" (GISB) компани ажиллуулдаг" гэв.

Аврагдсан хүүхдүүдийн дунд нэгээс 17 хүртэлх насны 201 хүү, 201 охин байсан бөгөөд тэднийг үл тоомсорлож, хүчирхийлсэн, бэлгийн дарамт үзүүлсэн гэх мэдээлэл авсны дараа мөрдөн шалгах үйл ажиллагаа явуулсан байна.

Тухайн мэдээллийг нэрээ нууцалсан хүн илгээсэн байна. Мөрдөн байцаалтын үеэр зарим хүүхдүүд нь Исламын шашинт "GISB" компанийн ажилтнуудын хүүхэд байжээ. Тухайн хүүхдүүдийг төрөөд удаагүй байхад нь байгууллагын асрамжийн газарт шилжүүлсэн бөгөөд хүчирхийлэл дунд өсдөг байсан гэж Разарудин мэдэгдсэн юм. Тэрбээр мөн "Хэрвээ хүүхдүүд өвдсөн бол эмнэлгийн тусламж авч чаддаггүй. Тэднийг алдаа гаргах бүрт нь шалзлам халуун халбагаар түлж шийтгэдэг байсан. Мөн асран хамгаалагч багш нар нь эрүүл мэндийн үзлэг нэртэйгээр биед нь зүй бусаар хүрдэг байсан" гэжээ.

"GISB" компани үүнийг үгүйсгэж байгаа бөгөөд гэм буруугүй гэдгээ нотолно гэв.

Тус компани Индонез, Сингапур, Египет, Саудын Араб, Франц зэрэг хэд хэдэн оронд үйл ажиллагаа явуулдаг бөгөөд өнчин хүүхэд асардаг сайн үйлсийн байгууллага гэх нэрийн доор мөнгө угаадаг байсан гэж цагдаа нар үзэж байна. Уг хэргийг хүүхдийн эсрэг бэлгийн хүчирхийлэл, хүн худалдаалах гэмт хэрэгтэй холбоотой хуулийн дагуу шалгаж байгаа юм.

Эх сурвалж: ALJAZEERA