Хойд Солонгосын удирдагч Ким Жон Ун цөмийн зэвсэгтэй холбоотой уран баяжуулах байгууламжид шалгалт хийж, үйлдвэрлэлтийг нэмэгдүүлэх даалгавар өгсөн байна. Эрх баригч Ажилчны намын Родонг Синмун сонины Баасан гаригийн дугаарт Ким центрифугийн тоог нэмэгдүүлж, шинэ төрлийн центрифуг нэвтрүүлэх төлөвлөгөөг урагшлуулахыг албаны хүмүүст даалгасан гэж бичжээ.

Зэвсгийн чанартай цөмийн материал үйлдвэрлэх суурийг цаашид бэхжүүлэх шаардлагатайг мөн Ким онцолсон байна.

Ким баяжуулах байгууламжтай танилцаж буй гэрэл зураг сонинд нийтлэгджээ. Хойд Солонгос арваннэгдүгээр сард болох АНУ-ын ерөнхийлөгчийн сонгуулийн өмнө цөмийн бүтээн байгуулалтаа цаашид ахиулах төлөвлөгөөгөө зарлаж магадгүй гэнэ. Түүнчлэн өнөөдөр /2024.09.13/ Ким Жон Уны ажиглалт дор 600 мм-ийн пуужин харвагч шинэ төрлийн төхөөрөмжийг туршилтаар харважээ. Хойд Солонгос эдгээр төхөөрөмжийг "супер том пуужингууд" гэж нэрлэсэн байна.

Эх сурвалж:NHK