Францын "Michelin" фирм, Их Британийн "Dunlop" зэрэг барууны үйлдвэрлэгч компаниуд өнгөрсөн жил 30 сая ам.долларын үнэ бүхий онгоцны дугуйг Орост худалдаалсан байна. Тус улс Укрианд түрэмгийлснээс хойш олон улсын хориг арга хэмжээнд орсон байдаг ч барууны зарим компаниудтай хамтран ажилласан хэвээр байна гэж Киев мэдэгдэв. Орос нисэх онгоцны дугуйгаа гадаад орнуудаас худалдан авдаг.

Гаалийн бүртгэлээс харахад 2023 онд тус улсад импортлогдсон дугуйны дийлэнх хувийг Франц, Их Британи, АНУ, Японд төвтэй компаниуд үйлдвэрлэсэн байна.

АНУ болон Европын холбоо 2022 оны хоёр болон дөрөвдүгээр сард Орост агаарын тээврийн дугуй худалдахыг хориглосон. Их Британи 2023 оны арванхоёрдугаар сард тодорхой хязгаарлалт тавьсан бол Япон тухайн оны долдугаар сард арга хэмжээ авсан байдаг. Гэсэн хэдий ч Орос хориг арга хэмжээг амжилттайгаар тойрон гарч, барууны компаниудаас худалдан авалт хийсээр байна.

Өнгөрсөн жилийн импортын 70 хувийг Францын үйлдвэрлэгч "Michelin"-ийн дугуй эзэлж, 28 сая ам.долларын борлуулалт хийжээ.

Уг бүтээгдэхүүнд Гадаад хэргийн сайд Сергей Лавровын ашигладаг нисэх онгоцны дугуй багтсан байна. Мөн АНУ-ын "Goodyear", Британийн "Dunlop", Японы "Bridgestone" нарын үйлдвэрлэсэн бүтээгдэхүүний импорт Орост ирсэн нь батлагдсан байна. Авлигаас урьдчилан сэргийлэх үндэсний агентлагийн дотоод тайланд дурдсанаар, өнгөрсөн жил Орост орж ирсэн барууны бараа бүтээгдэхүүний ихэнх нь Хятад, Турк, Арабын Нэгдсэн Эмират, Саудын Араб болон Төв Азийн орнуудаар дамжин иржээ. Шууд экспортыг гуравдагч орнуудад бүртгэлтэй компаниуд хийсэн бөгөөд гааль дээр Орост бус өөр улсын нэрийг ашиглан хориг арга хэмжээг тойрчээ.

Эх сурвалж: GUARDIAN