АНУ-ын ерөнхийлөгчийн сонгуульд өрсөлдөж буй Дональд Трамп, Камала Харрис нарын анхны мэтгэлцээн Мягмар гаригт болсон. Тэгвэл энэхүү мэтгэлцээний дараа Камала Харрис 24 цагийн дотор 47 сая ам.долларын хандив цуглуулжээ. 47 сая ам.долларыг Харрис болон түүний хамтрагч Тим Уолз нарыг дэмжих кампанит ажлын хороодод хандив өгсөн 600 мянган хүнээс бүрдүүлсэн байна.

Хандив цуглуулах өрсөлдөөнд Камала Харрис тэргүүлж яваа. 24 цагийн дотор цуглуулсан энэ хандив нь Харрисын кампанит ажилд томоохон түлхэц болж байна. Харрисын баг наймдугаар сард 361 сая ам.доллар цуглуулснаа саяхан зарласан. Гэтэл Трампийн баг тухайн сард 130 сая ам.доллар цуглуулсан байна. Камала Харрис долдугаар сард өрсөлдөөнд орж ирсэн эхний өдрөө 81 сая ам.доллар цуглуулж байв.

Ерөнхийлөгчийн сонгуульд өрсөлдөгчдийн мэтгэлцээн нь хөрөнгө босгох хамгийн гол үйл ажиллагаа юм. Тэдний мэтгэлцээнийг 67 сая хүн шууд үзсэн бөгөөд үүнээс гадна олон сая хүн янз бүрийн цахим хуудас болон стриминг платформоор үзсэн байх магадлалтай.

Эх сурвалж: CNBC