Монгол Улсад байнгын ажиллагаатай парламент үүсэж хөгжсөний 34 жилийн ой өнөөдөр тохиож байна. Түүхэн тэмдэглэлт өдрийг угтаж, Улсын Бага Хурлын гишүүн, УИХ-ын гишүүн асан Т.Очирхүүгийн сэтгэгдплийг хүргэе. Анхны 53 гишүүний нэг тэрбээр ийм дурсамж өгүүлсэн юм.

 –Улсын Бага Хурлын гишүүнээр сонгогдон ажилласан үеийн сэтгэгдлээ илэрхийлээч гэвэл та юу өгүүлэх вэ?

-Улсын Бага Хурал 1990 оны есдүгээр сарын 13-нд үйл ажиллагаагаа эхэлсэн. Энэ нь байнгын ажиллагаатай анхны парламент. Тиймээс манай улсад парламентын үйл ажиллагаа есдүгээр сарын 13-ны өдөр эхэлжээ гэж үзэж болно. Тэр өдрөөс хойш 34 жил өнгөрчээ. Өнөөдөр 9 дэх удаагийн УИХ-ын сонгууль явагдаж, 126 гишүүнтэй парламенттай болчихоод байна. Энэ бол шинэ үе. Шинэ үе, шинэ түүх эхэлж байна. Эдгээр 126 лидер Монгол Улсын ирэх 30 жилийн түүхийг бүтээнэ ээ гэж зарим судлаачид хэлээд байгаа юм. Их гайхалтай сорилт юм шүү. Юу гэсэн үг вэ? гэвэл УИХ-ын гишүүн, Засгийн газрын гишүүд, төрийн түшээд дотроо бодож, хариулах ёстой юм. Жишээ татахад, Улсын Бага Хурлын гишүүд бид тухайн үед “Ирэх 30 жилийг бүтээнэ“ гэж яриагүй. Гэхдээ бидний зорилго маш тодорхой байсан. Нэгдүгээрт, Монгол Улсаа зах зээлийн эдийн засагт шилжүүлье гэсэн зорилт тавьсан. Тухайн үед манай улс зах зээлтэй орон байгаагүй. Монголоо ардчилсан улс болгоё гэсэн. Манайд ардчилсан сонгууль ч байдаггүй. Хүний эрх харьцангуй чөлөөтэй биш, хязгаарлагдмал хүрээнд байсан тул хүний эрхийг дээдэлсэн, эрх зүйт төртэй улсыг бий болгоё гэсэн зорилго тавьсан. Тэгээд дэлхийн ардчилсан улс орнуудын эгнээнд эх орноо оруулъя гэсэн юм. Энэ бол гайхалтай зорилтууд байсан. Үүнд Улсын Бага Хуралд суудалтай улс төрийн дөрвөн намын 53 гишүүн ямар ч үггүйгээр нэгдэж байсанд л амжилтын гол нь байгаа юм. Тиймээс өнөөдөр анхны 126 гишүүн хөгжлийн шинэ эхлэлийг тавья гэж байгаа бол зорилго нэгтэй, зорилго руугаа нэгдмэл байр суурьтай явах ёстой. Эхний удаа хамтарсан Засгийн газар байгуулсан нь эхний, маш том чухал алхам гэж би бодож байна.

-Сонирхолтой дүгнэлт байна. Та шинэ гишүүдэд юуг захих вэ?

-Улс төрийн намууд зорилтоо дэвшүүлээд УИХ-ын үйл ажиллагаанд оролцохдоо, том зорилгодоо хүрэхийн тулд янз бүрийн үзэл бодол уралдуулж болно. Гэхдээ нэг зүйлийг мартаж болохгүй. Бид үндсэн зорилго руугаа л явах ёстой. Эхний чуулган, Засгийн газрын мөрийн хөтөлбөр, одоогийн Улсын Их Хурлаас дэвшүүлж байгаа зорилтоос харвал маш том амбицтай зорилтуудыг 126 маань дэвшүүлжээ. Энэ бол бахархмаар сайхан. Хүмүүсийн амьдрал, ахуйг сайжруулахын тулд эдийн засгаа өөд нь татах хэрэгтэй.