Барьцааны хүмүүсийг байрлуулж, заримынх нь амийг хөнөөсөн Хамасын нууц хонгилын бичлэгийг Израилийн арми дэлгэлээ. Төмөр хаалгаар битүүмжилсэн давчуу хонгилын бичлэгийг өнгөрсөн Баасан гаригт цэргийнхэн олж авчээ. Хохирогчдын ар гэр болон Израилийн Аюулгүй байдлын кабинетийнхан үзсэний дараа бичлэгийг олон нийтэд дэлгэсэн байна.

Хамасын барьцаанд байсан зургаан иргэний цогцсыг Газын зурвасын өмнөд хэсэгт орших Рафах бүсээс наймдугаар сарын 31-нд олсон. Тэднийг наймдугаар сарын 29-ний шөнө хөнөөжээ. Барьцааны зургаан иргэн бичлэгт гарч буй хонгил дотор Хамасын хоёр зэвсэгт этгээдийн гарт амь үрэгдсэн байна. Тэд энэхүү амьсгалахад бэрх, эгц босч зогсох боломжгүй, чийгтэй хонгилд хэдэн долоо хоногоор хоригдсон байх магадлалтай.

Хонгил газраас 20 метрийн гүнд байрлах бөгөөд өндөр нь 170 см хүрэхгүй, өргөн нь 80 орчим см байжээ.

Газын зурвас дахь мөргөлдөөний эхний өдөр Хамас бүлэглэл гадаад дотоодын 250 орчим хүнийг барьцаалсан. Солилцоогоор тэдний заримыг сулласан боловч өдгөө 100 орчим хүн барьцаалагдсан хэвээр байна. Мөн тэдний 30 орчим хувь нь нас барсан байж магадгүй гэж таамаглаж байна.

Эх сурвалж: REUTERS