АНУ-ын Тагнуулын төв газрын ажилтан асан Александр Юк Чинг Ма Хятадын засгийн газрын талд ажилласан хэргээр 10 жилийн хорих ял авчээ. Тэрбээр АНУ-ын нууцыг Хятадад худалдсан гэдгээ Холбооны мөрдөх товчоонд хүлээн зөвшөөрснөөр 2020 оны наймдугаар сард баривчлагдсан.

Хонгконгод төрсөн, америк иргэншилтэй Ма нь 71 настай. Тэрбээр 1982-1989 онд Тагнуулын төв газарт ажиллаж байжээ. Үүнээс залгуулаад Холбооны мөрдөх товчоонд ажиллаж байсан. Тодруулбал, Холбооны мөрдөх товчооны Хонолулу дахь оффист гэрээт хэл шинжлэлийн мэргэжилтнээр 2004 онд ажилд орсон байна. Тэрбээр Тагнуулын төв газрын ажилтан асан хамаатантайгаа хамтарч, Шанхайн Аюулгүй байдлын товчоонд нууц мэдээлэл өгдөг байжээ. Тухайн хүн нь Юк Чинг Магийн ах байсан бөгөөд түүнийг шүүхээс өмнө нас барсан.

Түүний Хятадад нууц мэдээлэл хуваалцсаныхаа төлөө 50 мянган ам.доллар бэлнээр авч буй нэгэн бичлэг нь баримт болон үлджээ.

Тэрбээр баривчлагдсаныхаа дараа АНУ-ын засгийн газартай ял хөнгөлөх гэрээ байгуулжээ. Уг гэрээнд зааснаар Александр Юк Чинг Ма АНУ-ын засгийн газрын агентлагуудад мэдээлэл өгөх замаар насан туршдаа прокуроруудтай хамтран ажиллана. Хэдийгээр 10 жилийн ял авсан ч гэлээ энэ нь харьцангуй хөнгөн ял болсон гэж үзэж байна.

Эх сурвалж: BBC