Хамас бүлэг Лхагва гаригт аль нэг талын шинэ нөхцөлгүйгээр, АНУ-ын өмнөх саналын дагуу Газын зурваст гал зогсоох хэлэлцээрийг хэрэгжүүлэхэд бэлэн гэдгээ илэрхийллээ. Бүлгийн ахлах албан тушаалтан Халил аль-Хайя тэргүүтэй хэлэлцээрийн баг Дохад Катарын ерөнхий сайд Шейх Мохаммед бин Абдулрахман Аль Тани, Египетийн Тагнуулын албаны дарга Аббас Камел зэрэг зуучлагч нартай уулзаж, Газын зурвасын сүүлийн үеийн нөхцөл байдлын талаар хэлэлцжээ.

Бүтэн жилийн нүүр үзэх дөхөөд буй Газын зурвас дахь мөргөлдөөний галыг зогсоох хэлэлцээр өнөөг хүртэл амжилт олоогүй. АНУ-ын Тагнуулын төв газрын дарга бөгөөд Газын асуудлаарх Вашингтоны ахлах хэлэлцээч Уильям Бернс гал зогсоох илүү нарийвчилсан санал гаргана гэдгээ өнгөрсөн Бямба гаригт мэдэгдсэн юм.

АНУ-ын ерөнхийлөгч Жо Байден өнгөрсөн зургадугаар сард гурван үе шат бүхий гал зогсоох саналыг дэвшүүлсэн. Үүнд, "бүрэн" гал зогсоох, Израилийн цэргийг Газын хүн ам суурьшсан бүх газраас гаргах, Палестины хоригдлуудыг суллахын тулд барьцаанд байсан эмэгтэйчүүд, өндөр настан, шархадсан хүмүүсийг буцааж өгөх багтжээ. Хоёр дахь шатанд амьд үлдсэн барьцааны хүмүүсийг суллаж, байлдааны ажиллагааг бүрмөсөн зогсоох багтана. Томоохон сэргээн босголтын төлөвлөгөө гурав дахь үе шатанд эхлэх юм байна.

Эх сурвалж: REUTERS