Орос, Украины дайны шинэ үе эхэлж буйг тохиолдуулан засаг захиргааны бүтцэд томоохон өөрчлөлт оруулахаар зэхэж буйгаа ерөнхийлөгч Зеленский зарласан. Энэ хүрээнд Гадаад хэргийн сайд Дмитрий Кулебагийн оронд түүний орлогч бөгөөд Турк дэх Элчин сайд асан Андрей Сыбихаг томилсон билээ. Тэргүүлэх чиглэлээ “зэвсэг, зэвсэг, бас дахин зэвсэг” гэж тодорхойлсон Андрей Сыбихаг Ньюс агентлаг ХҮМҮҮС буландаа онцолж байна.

Чадварлаг, сонгодог дипломатч гэдгээрээ танигдсан Андрей Сыбиха 1975 онд Украины Тернополь мужид төржээ. Тэрбээр 1997 онд Львовийн их сургуулийг олон улсын харилцааны мэргэжлээр төгссөн бөгөөд англи, польшоор чөлөөтэй ярьдаг. Мөн 1999 онд хуулийн чиглэлээр мэргэшжээ. Гэрлэсэн, гурван хүүхэдтэй.

Украины Гадаад хэргийн яамны албан ёсны цахим хуудсанд мэдээлснээр түүний албан тушаалын замнал 1997 оноос эхэлжээ. 1997-1998 онд Гадаад хэргийн яамны Олон улсын хууль зүйн асуудал эрхэлсэн ерөнхий газрын атташе, гуравдугаар, хоёрдугаар нарийн бичгийн албыг тус тус хашсан нь түүний карьерын эхлэл байв.

Улмаар Польш дахь Украины Элчин сайдын яамны нэгдүгээр, хоёрдугаар нарийн бичгийн дарга, Гадаад хэргийн яамны Европын интеграцчлалын ерөнхий газрын Хууль зүй, хүмүүнлэгийн хамтын ажиллагааны газрын нэгдүгээр нарийн бичгийн дарга, мөн яамны Олон улсын эрх зүйн асуудал эрхэлсэн ерөнхий газрын Олон улсын хуулийн хэлтсийн дарга зэрэг албан тушаалуудыг хашсан. Харин сүүлийн жилүүдэд Турк дэх Украины Элчин сайд, Украины Ерөнхийлөгчийн Тамгын газрын дэд дарга, Украины Гадаад хэргийн тэргүүн дэд сайд гэсэн албан тушаалуудыг хашжээ.

Тэрбээр энэ оны есдүгээр сарын 5-нд Гадаад хэргийн сайдаар томилогдсон даруйдаа тэргүүлэх чиглэлээ “зэвсэг, зэвсэг, бас дахин зэвсэг” гэж тодорхойлсон юм.

“Украины дипломат албаны нэн тэргүүний ажил бол Элчин сайдаас эхлээд атташе хүртэл Украины батлан ​​хамгаалах чадавхийг хангах явдал юм. Зэвсэг, зэвсэг, бас дахин зэвсэг. Барууны зэвсэг нийлүүлэлт болон ОХУ-ын нутаг дэвсгэрт зэвсэг ашиглахын эсрэг тавьсан зохиомол хязгаарлалтыг арилгах нь эргэлзээгүй манай тэргүүлэх чиглэл” гэж тэр хэлжээ.

Гадаад хэргийн сайд асан Дмитрий Кулебаг яагаад огцруулсан нь тодорхойгүй. Гэхдээ Ерөнхийлөгчийн тамгын газрын дарга Андрей Ермактай зөрчилдсөний улмаас халаа сэлгээнд орсон байж магадгүй гэх таамаг бий. Андрей Сыбихагийн хувьд дөрөвдүгээр сард Гадаад харилцааны тэргүүн дэд сайдаар дэвшихээсээ өмнө Ермакийн орлогчоор ажиллаж байжээ. Тэгэхээр багийн тоглолтод Сыбиха илүү тохирно гэж ерөнхийлөгч үнэлсэн байх магадлалтай.

Турк, Польш улс дахь Украины Элчин сайдын яамдад ажиллаж байсан туршлагатай учир дипломат болон гадаад бодлогын хувьд найдвартай, итгэлтэй хүн гэж түүнийг үздэг. Зеленскийтэй ойр ажилладаг эх сурвалж хэлэхдээ “Сыбиха бол хүчирхэг сонгодог дипломатч. Тэр системийг сайн мэддэг. Мөн тэр өмнө нь Элчин сайдаар ажиллаж байсан туршлагатай бөгөөд дайн эхэлснээс хойш түншүүдтэйгээ нягт хамтран ажиллаж байгаа” гэжээ.

Польшийн дипломатууд ч Сыбихад ам сайтай байдаг бөгөөд түүнийг “амласандаа хүрдэг хүн” гэж тодорхойлжээ. Сыбиха бол Оросын түрэмгийллийн эхэн үед Польш-Украины хамтын ажиллагааг бий болгосон улстөрчдийн нэг.

Украины парламентын гишүүн Галина Михайлюк түүний талаар ярихдаа “Сыбиха албан тушаалынхаа он жилүүдэд хамтран ажиллагсдаасаа эрх мэдэл, хүндэтгэлийг олж авсан” гэжээ.

Тэрбээр тэргүүлэх чиглэлээрээ Украиныг Европын холбоо болон НАТО-д элсүүлэх явдлыг мөн нэрлэв. Оросууд довтолсон эхний өдрүүдэд Сыбиха Украиныг Европын холбоонд элсүүлэх албан ёсны хүсэлтийг анх зарласан хүмүүсийн нэг байжээ.

Цаашилбал, геополитикийн шинэ бодит байдалд нийцүүлэхийн тулд Украины дипломат аппаратыг шинэчлэх талаар цухас дурджээ. “Саяхан болсон Элчин сайд нарын уулзалтаар бид шинэ дипломат институти нээх нэн тэргүүний улс орон, бүс нутгуудын жагсаалтыг зөвшилцсөн. Шинэ Элчин сайд, ерөнхий консул гэх мэтээр системийг бэхжүүлэхэд чиглэсэн боловсон хүчний өөрчлөлт хийгдэнэ” гэжээ.

Шинэ томилогдсон Гадаад хэргийн сайдаас иргэд болон хууль тогтоогчид юу хүсч байна вэ? Түүнийг Украинд үзүүлэх тусламжийн урсгал, тэр дундаа Оросын царцсан хөрөнгийг Украинд шилжүүлэх зэрэг сүүлийн үед удаашралтай байгаа асуудлуудыг шийдэхийг хүсч байна. Мөн Украины дүрвэгсэд болон гадаадад амьдарч буй иргэдэд үзүүлэх консулын үйлчилгээг сайжруулж, тэднийг эх орондоо авчрах арга замыг хайх, энх тайвны төлөвлөгөөг хэрэгжүүлэхийн тулд Хятад болон Оросыг дэмждэг бусад орныг байлдан дагуулна гэж найдаж байна.

Эх сурвалж: POLITICO, WIKIPEDIA