FIBA 3×3 сагсан бөмбөгийн 23 хүртэлх насны дэлхийн аварга шалгаруулах тэмцээн Улаанбаатар хотноо өнөөдөр/2024.09.11/ эхэллээ. Тив бүрийн шилдэг эрэгтэй, эмэгтэй тус бүр 20 баг таван өдрийн турш Сүхбаатарын талбай дээр үнэн хүчийг үзэж, цэнхэр гаригийн тэргүүн багаа тодруулна.

Эрэгтэйчүүдийн хэсгийг танилцуулъя.

• А хэсэг: Франц, Египет, Испани, Украин, Алжир
• В хэсэг: Хятад, Нидерланд, Монгол, Япон, Бенин
• С хэсэг: Герман, Израиль, Итали, Шинэ Зеланд, Аргентин
• D хэсэг: Литви, Латви, Чили, АНУ, Кени

Эмэгтэйчүүдийн хэсгийг танилцуулъя.

• А хэсэг: Хятад, Унгар, Украин, Австри, Бенин
• В хэсэг: АНУ, Япон, Испани, Итали, Шинэ Зеланд
• С хэсэг: Герман, Монгол, Польш, Израил, Кени
• D хэсэг: Франц, Египет, Нидерланд, Чили, Уганда

ФАВОРИТУУД

Эрэгтэйчүүдийн ангилалд Францын шигшээ чансааг тэргүүлж байгаа. Тэдэнд Матео Чове гэх залуу авьяастан бий. Тэдний араас Европын хүчирхэг улсууд болох Герман, Литви, Латви, Нидерланд яригдана. Мэдээж аваргаа хамгаалагч АНУ-ын шигшээг мартаж болохгүй. Тэдний бүрэлдэхүүнд NBA-ийн хөгжлийн лигийн тамирчид дуудагдсан.

Мөн талбай дээр үргэлж шилдэг тоглолтыг үзүүлдэг Монголын шигшээ баг хүчтэй өрсөлдөгч байх болно. Г.Болор-Эрдэнийг олон улсад онцолж байна. Азиас Хятад, Японыг ч мартаж болохгүй.

Эмэгтэйчүүдийн тухайд Германы шигшээ багт л гэхэд Парисын олимпоос алтан медаль хүртсэн хоёр ч тамирчин бий. Олимпод түрүүлсэн ч залуучуудын дэлхийн аваргад түрүүлнэ гэдэг амаргүй. Учир нь аваргаа хамгаалагч Нидерланд болон хүчтэй бүрэлдэхүүнтэй Франц байна. Хятад, АНУ ч шилдэг тамирчдаа илгээжээ.

ОНЦЛОХ ТАМИРЧИД

Германы шигшээ багт 3х3 сагсан бөмбөгийн дарийн утаа үнэрлэж, олон тэмцээнд оролцсон туршлагатай залуус бий. Тэдний тэсрэлт ч гайхалтай. Дензель Агьеман, Фабиан Гиесманн нарыг гайхалтай тохолт, хаалт Сүхбаатарын талбайг чимээ шуугианд автуулна.

Мөн Израилийн Шохам Гат гэж элдэвтэй нөхөр бий. Бөмбөг түүний гарт байхад гайхалтай зүйлс тохиолддог гэдгийг бүү мартаарай. Нидерландаас Жакопо Бертотти, Тимо Слонд нар цойлж буй. Олимп аварга болсон ах нарынхаа ялалтын буухиаг үргэлжлүүлэх зорилготой Монголд буусан нь гарцаагүй.

Эмэгтэйчүүд дундаа Элиса Мевиус, Марье Речихерт нар бол том одод. Арга ч үгүй. Шинэхэн олимпийн аваргууд дэлхийн аварга болохоор иржээ. Тэднээс гадна Викторын эгч Эве Вембанямагийн тоглолтыг монголчууд тэсэн ядан хүлээж байна. Дүү нь хэдийнэ NBA-д нэрээ үлдээж, мөрөө гаргаж, од болохоо харуулсан. Эзэн орны багт Б.Ариунцэцэг байгаа. Өнгөрсөн улирал тэрбээр дийлдэшгүй тоглолттой байсан билээ.