Массачусетсийн зүүн өмнөд эргийн гүнээс 1856 онд живсэн "Ле Люнэй" хөлөг онгоц олдсоныг "Atlantic Wreck Salvage" компани зарлалаа. Тухайлбал, 1855 онд бүтээгдсэн "Ле Люнэй" хөлөг 1856 оны арваннэгдүгээр сарын 2-нд Францын Гавр руу буцаж яваад "Адриатик" нэртэй хөлөгтэй мөргөлдсөн байна. Атлантын далай дамнасан зорчигч болон шуудангийн үйлчилгээнд ашиглахаар зургаан хөлөг онгоц бүтээсний нэг "Ле Люнэй" байв.

Ослын улмаас хөлгийн бөөрөнд хэд хэдэн нүх гарч, хэдэн өдрийн дараа хөлөг онгоц живжээ. Өөр хөлөгтэй мөргөлдсөн ч аяллаа хэвийн үргэлжлүүлсээр байсан тул зорчигчид онгоц нь аажмаар усаар дүүрч буйг мэдээгүй.

Тухайн үед хөлөгт 132 зорчигч явсны 114 нь нас барсан бол цөөхөн амьд үлдэгдсэд нь аврах завь дээр долоо хоногийг өнгөрүүлсэн.

"Atlantic Wreck Salvage" компани уг хөлөг онгоцыг найман жил хайжээ. Хөлөг онгоцыг олсны дараа эрлийн багийнханд тайвшрах, баярлах, гайхах мэдрэмж зэрэгцэн төрснөө хуваалцсан байна. Эрлийн багийн гишүүний хэлснээр Хойд Атлантын далай нь хөлөг онгоцны сүйрэлд харгис хэрцгий ханддаг аж. Шуурга, усны урсгал, элсний хөдөлгөөн, загас агнуурын хэрэгсэл зэргээс болоод онгоцны сэг нэг дороо бөөн байх нь ховор. Эрт үеийн сүйрлүүдийн ихэнх нь цаг хугацааны явцад далайн гүнд бүрэн булагдсан байдаг ажээ.

"Ле Люнэй" хөлөг онгоцны сүйрлийг дэлгэрэнгүй тайлбарласан "Адриатын хэрэг: Нантакетын эрэг орчимд онгоц мөргөчихөөд зугтсан нь" ном ирэх оны хоёрдугаар сард худалдаанд гарна. "Адриатик" хөлгийн ахмад "Ле Люнэй"-тэй мөргөлдсөн тухайгаа огт мэдээлээгүй тул номыг ийн нэрийджээ.

Эх сурвалж: FOX NEWS