Залилах төрлийн гэмт хэрэг сүүлийн жилүүдэд өсөж байгааг цагдаагийн байгууллагаас мэдээлж буй. Сургуулийн үйл ажиллагаа эхэлж, хөл хөдөлгөөн нэмэгдсэнтэй холбоотой “Виз найдвартай гаргаж өгнө” гэх мэдээлэлд иргэд итгэн, залилангийн хохирогч болж байгаа ажээ.

Тухайлбал, Улаанбаатарт оршин суух хаягтай иргэн У нь “БНСУ-д виз гаргадаг хүн байна урьдчилгаа 4 сая төгрөг шилжүүлээд найдвартай виз гаргана” гэж олон удаагийн үйлдлээр 170 гаруй иргэнийг залилсныг цагдаагийн байгууллагаас илрүүлэн мөрдөн шалгах ажиллагаа үргэлжилж байгаа аж.

Тиймээс иргэдийг бусдад залилуулж, эдийн засаг, цаг хугацаагаар хохирохоос урьдчилан сэргийлж, аливаа үйлдэл хийхээсээ өмнө сайтар нягтлахыг сануулж байна.

Ямар ч төрлийн гэрчилгээ, виз, үнэмлэхийг хувь хүн гаргадаггүй болохыг цагдаагийн байгууллагаас анхааруулав. 

Сүүлийн гурван жилийн хугацаанд цагдаагийн байгууллагад бүртгэгдсэн гэмт хэрэгт дүн шинжилгээ хийхэд 96 мянган гэмт хэрэг бүртгэгдсэний 31 мянга нь залилах төрлийн гэмт хэрэг байгаа аж. Энэ оны нэгдүгээр улиралд 29 мянган гэмт хэрэг бүртгэгдсэний 11 мянга нь залилах төрлийн гэмт хэрэг байгаа юм. Үүнээс харахад өдөрт гурван хэрэг тутмын нэг нь залилах төрлийн гэмт хэрэг бүртгэгдэж байгааг Мөрдөн байцаах албаны залилах гэмт хэрэг мөрдөн шалгах хэлтсийн ахлах мөрдөгч Цагдаагийн хошууч Б.Ууганбаяр хэлэв.