"Улаанбаатар хот-Духуа инженеринг дэд бүтцийн хөгжлийн форум" өнөөдөр /2024.09.11/ боллоо.

Улаанбаатар хотод их багтаамжийн нийтийн тээврийн хэрэгсэл болох Метро барих төсөл нь нийслэлийн дэд бүтцийн хөгжлийн томоохон төсөл болж буйгаар онцлог юм. Уг төслийн хүрээнд “Улаанбаатар хот-Духуа инженеринг дэд бүтцийн хөгжлийн форум"- ыг "Маргаашийн өвийг хамтдаа бүтээцгээе" уриан дор зохион байгуулж байна. Форумаар Улаанбаатар хотод хэрэгжүүлэх боломжтой дэд бүтцийн бүтээн байгуулалтын төслийн санал солилцсон бөгөөд нийслэлийн Засаг даргын нэгдүгээр орлогч Н.Мандуул, Улаанбаатар хотын авто замын түгжрэлийг бууруулах нэгдсэн төсөл хэрэгжүүлэх нэгжийн захирал У.Баатар нар илтгэл тавьж, хэлэлцүүлэг өрнүүллээ.

Түүнчлэн салбарын бодлого тодорхойлогч, хэрэгжүүлэгч байгууллагууд буюу холбогдох яам, Засгийн газрын болон нийслэлийн агентлагийн мэргэжлийн төлөөлөл форумд оролцсон юм.

Нийслэлийн Засаг даргын нэгдүгээр орлогч Н.Мандуул  "Улаанбаатар хотод 2020 онд 414.3 мянган өрхөөс 49.8 хувь орон сууцанд, 50.2 хувь гэр хороололд амьдардаг байсан. Харин 2024 онд гэр хороололд амьдарч байгаа өрхийн эзлэх хувь 50.2-оос 44 хувь болон буурсан. Улаанбаатар хотын 2040 оны хөгжлийн ерөнхий төлөвлөгөөний үзэл баримтлалд 2040 он гэхэд гэр хороололд амьдарч байгаа өрхийг 16 хувь болгож бууруулахаар тусгасан.

Гэр хорооллыг орон сууцжуулан хотын төвлөрлийг сааруулах зорилгоор 202,626 айлын орон сууцны төслүүдийг хэрэгжүүлж байна.

Гэр хорооллын бүсэд нийгмийн болон инженерийн дэд бүтцийг цогцоор шийдсэн зургаан шинэ дэд төвийн бүтээн байгуулалтын ажлыг үе шаттайгаар хэрэгжүүлж байна. Үүнээс Сэлбэ, Баянхошуу дэд төвд 20 мянган айлыг дэд бүтцээр хангах бүтээн байгуулалтын ажлыг 2023 онд 100 хувь хийж дуусган гэр хорооллыг орон сууцжуулах төслийг хэрэгжүүлж эхлээд байна. Дамбадаржаа дэд төвийн дэд бүтцийн бүтээн байгуулалтын ажлын гүйцэтгэл 2020 онд 19 хувь байсан бол 2024 онд 55.2 хувь, Толгойт дэд төвийн гүйцэтгэл 40 хувь байна" гэдгийг хэлж байв.

Мөн "Улаанбаатар хотын өнөөгийн байдал болон төлөвлөсөн төслүүд” сэдвээр нийслэл Улаанбаатар хотын авто замын түгжрэлийг бууруулах нэгдсэн төсөл хэрэгжүүлэх нэгжийн захирал У.Баатар илтгэл хэлэлцүүлэв.

Тэрбээр "Улаанбаатар хотын өнөөгийн авто замын нөхцөл байдлын хувьд Улаанбаатар хотын 2040 он хүртэлх хөгжлийн ерөнхий төлөвлөгөөний хүрээнд хийсэн судалгаанаас харахад хотын аггломерац, замын түгжрээ, байгаль орчны бохирдол, гамшгийн эрсдэл зэрэг нь тулгарч буй томоохон асуудлууд юм.

Улаанбаатар хотод бүртгэлтэй автомашины тоо нь жилд дунджаар 9.1 хувь өсөж байгаа бол импортоор орж ирж буй автомашины тоо хэмжээ дунджаар жилд 15 хувь өсөж байна.

Энэхүү тоо хэмжээний өсөлттэй уялдаа холбоотойгоор авто замыг шинээр барьж байгуулах шаардлагатай байгаа боловч жилд дунджаар хоёр хувийн өсөлт ажиглагдаж байна" гэв.