Парис 2024 зуны олимпийн наадмын брэйк бүжгийн төрөлд Австралийн бүжигчин Рэйган буюу Рэйчил Ганн 0 оноо авч, хамгийн муу үзүүлэлттэй оролцсон. Түүгээр ч үл барам Рэйганы бүжиг цахим орчныг шуугиулж, хэрхэн олимпийн эрх авсанд нь эргэлзэх хүмүүс ч гарч ирсэн. Тэрбээр 2023 онд Дэлхийн бүжгийн спортын холбооноос зохион байгуулсан Далайн бүсийн аварга шалгаруулах тэмцээнд алтан медаль хүртсэнээр олимпийн наадамд оролцох эрх авчээ.

Тэгвэл өвөрмөц хошин бүжгээрээ үзэгчдийг баясгахын зэрэгцээ янз бүрийн шүүмжлэлд хүртэл өртсөн Рэйган өдгөө дэлхийд нэгдүгээрт эрэмбэлэгдэж байна. Тодруулбал, Дэлхийн бүжгийн спортын холбооноос саяхан гаргасан эмэгтэй бүжигчдийн чансааны тэргүүн байрыг Рэйган эзэлжээ. Сонирхолтой нь олимпийн эмэгтэй брэйк бүжгийн төрлийн медальтнууд эхний 10-т багтаагүй.

Эмэгтэй брэйк бүжгийн төрлийн алт, мөнгө, хүрэл медалийг Япон, Литва, Хятад улсын тамирчид хүртсэн билээ.

Дэлхийн бүжгийн спортын холбоо уг чансааг гаргахдаа сүүлийн 12 сарын хугацаанд тухайн тамирчны үзүүлсэн шилдэг дөрвөн үзүүлбэрт үндэслэдэг. Гэхдээ Шанхай, Будапештэд болсон олимпийн эрхийн төлөөх тэмцээн, Парисын наадмын үзүүлбэрүүдийг тооцоогүй. Чансаа тогтоолт нь тамирчдад олимпийн наадмын бэлтгэлд бүрэн анхаарлаа хандуулах боломж олгохгүй гэж үздэг. Энэ удаад олимпийн эрх олгох тогтолцоотой уялдуулан 2023 оны арванхоёрдугаар сарын 31-ээс олимпийн наадам эхлэх хүртэлх хугацаанд чансаа тогтоох арга хэмжээг зориудаар зохион байгуулаагүй.

Тиймээс Рэйганы тэргүүн байр эзлээд буй эрэмбэ нь эцсийн дүн биш эхний байдлаар танилцуулж буй чансаа юм. Ирэх аравдугаар сард Шанхайд болох тэмцээний дараа эрэмбэ дахин шинэчлэгдэнэ.

Эх сурвалж: CNN