Монголын хөлбөмбөгийн шигшээ баг өчигдөр/2024.09.10/ Улаанбаатар хотноо Зүүн Тиморын шигшээг хүлээн авч тоглолоо. Хоёр баг Азийн аваргын урьдчилсан шатанд өрсөлдөх эрхийн төлөө учраа таарсан бөгөөд эхний тоглолт Балид болоход Зүүн Тимор 4-1 гэсэн харьцаатай хожсон юм. Энэ ч утгаараа Монголын шигшээ баг нутаг дээрээ өрсөлдөгчөө дор хаяж гурван гоолын зөрүүтэй хожих хүндхэн даалгавартай талбайд гарсан. Тоглолтын өмнөх хэвлэлийн бага хурал дээр дасгалжуулагч Б.Гарьдмагнай багаа довтлуулж тоглоно гэдгээ мэдэгдсэн. Үүний дагуу ч Монголын баг довтолгооны хөлбөмбөгийг эхний минутаас үзүүлэв.

Гарааны тухайд шигшээ багийн ахлагч Х.Цэнд-Аюушийн торгууль дуусч эргэн ирсэн бол цагтаа Монголын шилдэг хөлбөмбөгчин болж байсан А.Тэмүүжин довтолгоог дэмжих зорилгоор гараанд гарсан. Мөн эхний тоглолтыг сэлгээнээс эхлүүлсэн хамгаалагч Филип Чинзориг гараанд гарч, нөлөөгөө мэдрүүлсэн. Тэрбээр эхний гоолын дамжуулалтыг булангийн цохилтоос өгч, Д.Төрбатын мөргөлтөөр Монголын баг эхний гоолоо оруулсан.

Эхний тоглолттой харьцуулахад нутаг дээрээ Монголын шигшээ багийн довтолгооны санаачилга, шилжилт үнэхээр тэс өөр байсан. Х.Цэнд-Аюуш, А.Тэмүүжин хоёр ч дундын шугамыг сайн удирдаж, хамгаалалт довтолгоонд идэвхитэй байв. Нөгөө талаараа хамгаалалт ч тун сайн байсныг дурдах хэрэгтэй. Э.Мөнх-Эрдэнэ ч олон гайхалтай хаалтыг толилуулсан. Нэгдүгээр үе 1-0 гэсэн харьцаатай өндөрлөж, хоёрдугаар үед дахин хоёр гоол оруулах шаардлагатай болов.

Хоёрдугаар үеийн эхлэлд сэлгээгээр талбайд гарсан А.Дөлгөөн гоол оруулж, 2-0 гэсэн харьцаатай тэргүүллээ хадгалсан. Түүний довтолгоог талбайн төвөөс А.Тэмүүжин эхлүүлж, А.Мижиддоржийн хөндлөн дамжуулалтаар А.Дөлгөөн гоол оруулсан юм. Үлдсэн хугацаанд Монголын баг аюултай довтолгоог олон өрнүүлсэн ч дахин гоол оруулж чадсангүй. Үндсэн цагт 2-0 гэсэн харьцаатай хожиж, нийлбэр дүнгээр 3-4 гэсэн харьцаатай ялагдал хүлээснээр 2027 оны Азийн аваргын урьдчилсан шатанд өрсөлдөх эрхээ авсангүй.