Дэлхий дээр шинэ тутам нээгдэж буй нүүрсний уурхайнуудын талаас илүү хувь нь Хятадын эзэмшлийнх байна гэдгийг Мягмар гаригт нийтлэгдсэн "Global Energy Monitor" байгууллагын тайланд дурджээ. Тодруулбал, Хятад улс жил бүр 1.28 тэрбум тонн нүүрс олборлох хангалттай хүчин чадалтай шинэ уурхайнуудын төслийг удирдаж байна. Эдгээр уурхайн дотор жилд дор хаяж нэг сая тонн нүүрс олборлох хүчин чадалтай томоохон нь ч бий.

Шинэ уурхайнуудын 35 хувь нь одоогоор бүтээн байгуулалтын шатандаа явж байна. Тэгэхээр 3-5 жилийн дараа нүүрс олборлолт нэмэгдэнэ гэсэн үг. Үүнийг дагалдаад метан хийн ялгаруулалт ч мэдэгдэхүйц нэмэгдэнэ.

"Global Energy Monitor" байгууллагын төслийн менежер Дороти Мэй хэлэхдээ "Нүүрсний үйлдвэрлэлийн хүчин чадлыг нэмэгдүүлэх нь одоогоор үндэсний бодлогын тэргүүлэх чиглэл, улс төрийн зорилт юм. Энэ салбарт давамгайлж буй төрийн өмчит аж ахуйн нэгжүүд уг зорилтыг биелүүлэх үүрэг хүлээдэг. Хятадын урт хугацааны гэрээний систем нь нүүрсний компаниудын ашигтай ажиллах баталгаа болдог" гэв.

Хятадын одоо байгаа уурхайнууд дэлхийн нүүрсний уурхайн метан хийн ялгарлын 70 хувийг бүрдүүлж буй. Энэ нь жилд 3.88 тэрбум тонн буюу дэлхийн нийт олборлолтын бараг тал хувьтай тэнцэнэ. Бүтээн байгуулалтын шатандаа явж буй төслүүд дууссанаар дээрх тоо 75 болж өсөх аж. Тиймээс үйлдвэрлэлийн өсөлт нь Хятадын нүүрстөрөгчийн давхар ислийг саармагжуулах зорилттой эрс зөрчилдөж байна гэж "Global Energy Monitor"-ын тайланд дурджээ.

Дэлхийн хамгийн том чулуужсан түлш үйлдвэрлэгч бөгөөд хэрэглэгч Хятад улс 2023 онд 4.66 тэрбум тонн нүүрс олборлосон нь түүхэн дээд амжилт болжээ.

Эх сурвалж: REUTERS