Парисын паралимп өндөрлөж, Монголын баг тамирчид түүхэнд байгаагүй өндөр амжилтаа үзүүлж, ард түмнээ цэнгүүллээ. Парисын олимпоор Монголын тамирчид алтан медалийн үзүүрээс атгаад алдаж, медалийн төлөөх барилдааны төгсгөлд дийлдэж байсан гашуун дурсамж үлдсэн. Тэгвэл паралимпийн тамирчид тэр бүх дутуу мэдрэмжийг дүүргэж, медалийн хур буулгалаа. Үүгээр ч зогсохгүй Монголын 111 мянга гаруй хөгжлийн бэрхшээлтэй иргэдэд итгэл найдвар, урам зориг төрүүлэв.

У.Сүрэнжав таеквондогийн төрөлд алтан медаль хүртсэнээр Монголын спортын түүхэнд олимп, паралимпийн тамирчдаас аварга болсон анхны эмэгтэй тамирчин болсон. Түүнээс гадна Э.Содномпилжээ пауэрлифтингийн төрөлд мөнгөн медаль хүртэж, олимп, паралимпийн тамирчдаас алт, мөнгө, хүрэл медальтай болсон анхны тамирчин болов. Харин хөнгөн атлетикийн төрөлд Ц.Баттулга мөнгөн медаль хүртэж, Монголын хөнгөн атлетикийн түүхэнд цоо шинэ хуудсыг нээжээ.

• Алт – У.Сүрэнжав /Таеквондогийн эмэгтэйчүүдийн К44 ангиллын -52 кг/
• Мөнгө – Г.Болор-Эрдэнэ /Таеквондогийн эрэгтэйчүүдийн К44 ангиллын -63 кг/
• Мөнгө – Ц.Баттулга /Хөнгөн атлетикийн эрэгтэйчүүдийн бөөрөнцөг түлхэлтийн төрлийн F40 ангилал/
• Мөнгө – Э.Содномпилжээ /Пауэрлифтингийн эрэгтэйчүүдийн -107 кг/

11 хоногийн турш монгол орон паралимпийн баг тамирчдынхаа ялалт, ялагдлыг амьсгаа даран хамтдаа мэдэрч, нийгэмд эерэг зөв давалгаа үүсчээ.

Амжилт бүхний ард дэмжлэг байдаг. Цэнхэр дэлгэцээр төдийлөн гардаггүй, нэр нь ч дурсагдах нь бага тийм хүмүүс байх аж. Тэдний нэг бол Монголын паралимпийн хорооны ерөнхийлөгч Д.Нямхүү. Түүний хувьд 2009 оноос хойш паралимпийн хорооны ерөнхийлөгчийн албыг хашиж байгаа бөгөөд энэ хугацаанд хоёр ч олимпийн аварга төрж, медалийн буухиа тасарсангүй. Тамга тэмдэг, гэрчилгээ, данс нь байхгүй, ундуй сундуй байгууллагыг хүлээн авч, спорт холбоодыг төрөлжүүлсэн. Паралимпийн дөрөв спортын холбоотой байсан хороо одоо 17 спортын холбоотой болж, тамирчдаа бэлдэж байна. Ингээд бодохоор Монголд паралимпийн спорт хөгжих, нэг наадмаас дөрвөн медаль хүртэх бололцоо бага багаар бүрджээ.

Д.Нямхүү паралимпийн хороог удирдаж эхэлснээс хойш Монголын баг дөрвөн наадмаас хоёр алт, гурван мөнгө, хоёр хүрэл медаль хүртжээ. Мөн паралимпод оролцогсдын тоо, өрсөлдөж буй төрөл нь нэмэгдэж буй. 2012 оны Лондонгийн паралимпод дөрвөн спортын төрөлд зургаан тамирчин оролцож байсан бол сүүлийн Парисын олимпод зургаан спортын төрөлд 12 тамирчин оролцсон үзүүлэлттэй. Үзүүлсэн амжилт, оролцсон тооноос нь харахад л Монголд паралимп гэх ойлголт түгэн дэлгэрч, хөгжлийн бэрхшээлтэй иргэд спортоор хичээллэх, өөрсдийгөө нээн хөгжүүлэх боломж бүрдэж байна.

Олимпийн хороотой харьцуулахад Монголын паралимпийн хорооны төсөв, бүтэц бүрэлдэхүүн, дэмжлэг дэндүү ядмаг. Ямар сайндаа 2024 онд л анх удаагаа паралимпийг улс даяар шууд дамжууллаа. Өмнө нь Монголд паралимпийг шууд дамжуулсан тохиолдол байгаагүй гэхээр монголчууд нэг их ойшоодоггүй байсан нь харагдана. 2008 онд Д.Баатаржавыг паралимпоос алтан медаль хүртэхэд Монголоос телевиз, хэвлэл мэдээлэл байгаагүй гэдэг. Сураг л сонсогдсон хэрэг. Хэвлэл мэдээлэл анхаарахгүй, нийгэмд ойлголт байхгүй болохоор ивээн тэтгэх, дэмжлэг туслалцаа үзүүлэх аж, ахуй нэгж, байгууллага ч олдохгүй. Ийм л хэцүү нөхцөлд Монголын паралимпийн хороо оршин тогтнож, гал алдахгүй явсаар хүртэх ёстой амжилтаа хүртлээ. Ирэх Лос Анжелесын паралимпод илүү өргөн бүрэлдэхүүнтэй, илүү олон амжилт үзүүлээсэй гэж хүсэгчид олширчээ. Энэ бүх амжилтыг бодитой болоход чухал үүрэг гүйцэтгэсэн Д.Нямхүү тэргүүтэй Монголын паралимпийн хорооны арын албаныхан болон тамирчдыг дэмжсэн аж ахуй нэгж, хүмүүстээ баярлалаа.