Сүхбаатар дүүргийн 16 дугаар хороо буюу Нэгдүгээр эмнэлэг, Гадаад харилцааны яам, Улаанбаатар Сонгдо эмнэлгийн орчимд халуун ус тасраад гурван сар болжээ. Учир нь тухайн хэсгийн дунд зам дагуу дулааны шугам угсралтын ажил хийгдэж байгаа аж. Өнгөрсөн зургаадугаар сарын 1-нээс эхлэн халуун ус тасалж, өнөөдрийг хүртэл өгөөгүй байгаа талаар тухайн газрын аж ахуй нэгжүүдийн төлөөлөл хэлэв. Энэ талаар Сонгдо эмнэлгийн үйл ажиллагаа хариуцсан захирал О. Пүрэвпунцагаас тодрууллаа.

-Дулааны шугам угсралтын ажил хэзээ эхэлсэн бэ? Одоо нөхцөл байдал ямар байна?

 -Ерөнхийдөө өнгөрсөн хоёрдугаар сараас хойш дулааны шугам засварын ажил зургаан сарын эхээр эхэлнэ гэж мэдээлж байсан. Гэвч засварын ажил эхлэхгүй байсаар наймдугаар сарын 1-нээс Сонгдо, Нэгдүгээр эмнэлэг орчмын дулааны шугам засварын ажил эхэлсэн. Долдугаар сарын эхээр халуун ус тасалсан.

Манай эмнэлэг болон ойр орчмын цэцэрлэг, банк зэрэг аж ахуй нэгжүүд хоёр сар гаруй хугацаанд халуун усгүй байна.

Агшин зуурын ус халаагч ашиглаж эмчилгээ үйлчилгээгээ үзүүлж байна. Улсын ажил тул дэмжиж байгаа. Гэхдээ ажил хэзээ дуусах нь тодорхойгүй байна. Багшийн дээдийн баруун талд, Гадаад харилцааны яам, манай эмнэлгийн хойд талын зам дагуу Драмын театр хүртэл нүх ухчихсан. Баахан хоолой авч ирээд орхисон тул явган хүн болон машинтай явахад ч төвөгтэй байна. Бидний харж байгаагаар хийх ажлынх нь 50 хувь ч дуусаагүй юм шиг байна. Ямартай ч есдүгээр сарын 15-н гэхэд халаалт, халуун усаа авна гэдэг шаардлагаа холбогдох газарт нь хүргүүлж байгаа.

-Хугацаандаа ажил нь дуусахгүй юм байна. Үүнийгээ юу гэж тайлбарладаг вэ? Та бүгдийн зүгээс холбогдох хүмүүсээс асууж лавласан уу?

-Улсын хийгдэх ёстой ажил учраас ойр ойрхон асуугаагүй. Гэхдээ засварын хугацаа нь тодорхой байвал зүгээр байна. Харамсалтай нь есдүгээр сарын 15-н болж байхад дуусах болоогүй байна. Анх манайд мэдэгдсэн албан тоотод зургаадугаар сарын 1-нээс есдүгээр сарын 15-н хүртэл дулааны шугам угсралтын засварын ажил хийж дуусна гэсэн байсан. Мөн эмнэлгийн үйл ажиллагааг доголдуулахгүйн тулд халуун усыг богино хугацаанд хязгаарлана гэдэг албан тоот өгсөн ч зургаан сараас хойш өнөөдрийг хүртэл халуун усгүй байлаа.

-Дулааны шугам угсралтын ажил хаанаас хийж байгаа вэ?

-Эрчим хүчний яамнаас Дэлхийн банкны санхүүжилтээр, Сүхбаатар дүүргийн 16 дугаар хороо орчимд дулааны магистраль шугамын ажлыг өргөтгөн шинэчлэх ажлыг хийж байгаа юм билээ. Бид ажил хийхийг эсэргүүцээгүй анх хэлсэн хугацаандаа ажлаа хийж дуусгаж халаалт халуун усаа өгөөч ээ гэж л шаардаж байна.

 Гадаад харилцааны яамны хүүхдийн цэцэрлэгийн багш Г.Должин:

"Цэцэрлэгийн хувьд зун үйл ажиллагаа явуулдаггүй болохоор асуудал байгаагүй. Анх бидэнд хэлэхдээ цэцэрлэгийн үйл ажиллагаа эхлэхээс өмнө дуусгана гэж хэлсэн. Гэтэл цэцэрлэгийн урдуур нүх ухаад орхичихсон шугам угсралтын засварын ажил нь цэцэрлэгийн үйл ажиллагаа эхлэхэд дуусаагүй байна. Хүүхдүүд орж гарахад хүндрэлтэй нөхцөл байдалтай л байна.

Мөн усаа халааж аяга тавгаа угааж, цэвэрлэгээгээ хийдэг. Дээрээс нь хүүхдүүд гар нүүрээ угаахад хүйтэн устай хэцүү байна. Есдүгээр сарын 15-нд халаалтаа авах боломжгүй болоод байгаа.

Хүүхдүүдээ дулаан хувцаслаж ирээрэй гэж хэлээд байж байна” гэлээ.

Уг асуудлаар Улаанбаатар хотын дулаан хангамжийн үр ашгийг нэмэгдүүлэх төслийн зохицуулагч Э.Мөндөрөөс лавлахад, аравдугаар сарын 1-нээс аж ахуй нэгжүүдийн халаалтыг өгнө. Анх зургаан сарын 1-нд дулааны шугам засварын ажил эхлээд, наймдугаар сарын 15-нд дуусгана гэж төлөвлөж байсан.

Гэтэл УИХ-ын сонгуультай холбоотой дулааны шугамуудыг өргөтгөн шинэчлэх барилга угсралтын ажлыг эхлүүлэх зөвшөөрлийг Улаанбаатар зам засвар арчлалтын газраас долдугаар сард өгсөн.

Үүнээс үүдэж ажлын явц удааширч хэлсэн цаг хугацаандаа дуусахгүй байна. Мөн дулааны шугамыг өргөтгөн шинэчлэхийн тулд бусад инженерийн шугам сүлжээнүүдийг хамтад нь сольж өргөтгөн шинэчлэх гээд нүсэр ажил болж байна. Тухайлбал, мэдээлэл холбооны сүлжээ кабель шугамууд, УБЦТС-ний шугам сүлжээ, Ус сувгийн удирдах газрын цэвэр усны шугамыг өргөтгөн шинэчлэх ажил давхар хийгдэж байгаа учир ажил удааширч байгаа гэх мэдээллийг өгөв.