Монголын шигшээ багийн шинэ ахлах дасгалжуулагч Б.Гарьдмагнай багаа удирдан анх удаагаа эх орондоо тоглоно. Түүний эхлэл тааруу байсан ч алдаагаа засч, хожил байгуулах боломж бүрэн бий. Өнөөдөр хоёр багийнхан хэвлэлийн хуралд оролцжээ. Энэ үеэр Монголын шигшээ багийн ахлах дасгалжуулагч Б.Гарьдмагнай, тоглогч Х.Цэнд-Аюуш нар “Бид Индонезиос хүндхэн даалгавартай буцаж ирсэн. Өмнөх шатны тоглолтдоо хамгаалах тактиктай тоглосон бол энэ удаад довтлох тактик барина. Бүхий л нөөц бололцоогоо дайчлан тоглоно. Өөрийн талбай, өөрийн хөгжөөн дэмжигчид, сэтгэл зүйн тал дээр бидэнд илүү давуу байдал бий болж байгаа учир бүх хүчээ дайчлан хожлын төлөө хичээх болно. Хөлбөмбөгийн үзэгч, сонирхогчдоо өргөнөөр ирж биднийг дэмжихийг хүсье” гэлээ.

Харин Зүүн Тиморын шигшээ багийн ахлах дасгалжуулагч Саймон Пабло “Тоглолтын хувь заяа хаашаа ч эргэж магадгүй нөхцөлд байна. Бид Монголын тамирчдыг хүндэлж байна, тэд ямар тэсвэр хатуужилтай гэдгийг бид өнгөрсөн хугацааны тоглолтуудаас харж ойлгосон. Монголын талбайн зүлэг Бали хотынхоос ялгаатай байна. Гэхдээ бид аль болох үүнтэй зохицохыг хичээж байна” гэв.