Урлан бүтээх төв элсэлт авч эхэлсэнтэй холбоотойгоор элсэлтийн тухай  тус төвийн сургалтын менежер Л.Атараас зарим зүйлийг тодрууллаа.

-Хүүхдийн урлан бүтээх төвийн үнэ төлбөргүй сургалт маш эрэлттэй байдаг. Жилд нэг л удаа элсэлт авдаг уу. Хүмүүс хүүхдээ хэрхэн бүртгүүлэх боломжтой вэ?

-Хүүхдийн урлан бүтээх төв  жил бүрийн есдүгээр сарын эхний долоо хоногт сургалтын бүртгэлээ хийдэг. Элсүүлэхдээ хүүхдүүдийн ерөнхий ур чадварыг шалгадаг. Намар элсэлтээ авахаас гадна улирал, улиралдаа нэмэлт элсэлт авдаг. Энэ сарын 14-нд хичээлийн жилийн нээлтээ хийнэ. Тайлангийн хувьд ирэх оны тавдугаар сарын 15-нд тайлагнана.

Өнгөрсөн жил 20 дугуйланд элсэлт авч байсан. Энэ хичээлийн жилд Хүүхдийн урлан бүтээх төв 22 дугуйланд элсэлт авна.

Уран хатгамал болон уран сийлбэрийн дугуйлан нэмэгдсэн. Төлбөртэй сургалт байхгүй.

-Үнэ төлбөргүй сургалтад хэчнээн хүүхэд суралцдаг вэ? 

–Жилд дунджаар 3000-4000 хүүхэд бүртгүүлдэг ч анги танхимын хүрэлцээ бага учраас 2000-2500 хүүхэд бүртгэж авдаг. Багш нарын хувьд нийт 22 багш байгаа. Нэг дугуйланд нэг багш хоёр ээлжээр хичээлээ заадаг.

–Хэдэн насны хүүхдүүдийг элсүүлдэг вэ? 

-Сургалтад 2-12 дугаар ангийн хүүхдүүдийг элсүүлдэг. Дугуйлангуудаас хамаарч 2-3 шаттай байдаг. Ихэнхдээ анхан болон дунд шат гэж хуваадаг. Сургалтын төрөл бүрт анхан шатнаас нь үздэг. Ер нь 2-5 дугаар ангийн хүүхдүүдийг анхан шатанд элсүүлж авдаг.

–Сургалтад материаллаг зүйл их хэрэг болдог. Хүүхдүүд өөрсдөө авчрах уу?

–Хүүхдүүдээс материал шаардахгүй. Улсын зардлаар сургалтын хэрэглэгдэхүүнийг бэлддэг. Өөрсдийн тусгай хэрэгцээтэй зүйлсийг л хувиасаа гаргадаг. Харин үндсэн хэрэглэгдэхүүнийг төсвөөсөө бэлддэг.

-Хүүхдүүд түлхүү ямар дугуйланг сонирхож байна?

–Хүүхдүүд уран зураг, уран бичлэг, хувцас загвар, бэлэг дурсгал зэргийг их сонирхдог. Гэхдээ 22 дугуйланд бүгдэд нь л сонирхолтой байдаг. Хүүхдүүд өөрсдөө сонирхохоос байхаас гадна сүүлийн үед эцэг эхчүүд дэлгэцийн хамаарлаас хүүхдээ хамгаалах, хүүхдийнхээ харилцаа хандлагыг өөрчлөх зорилготойгоор манай дугуйланд хүүхдүүдээ сургах хандлага ихэссэн.

-Урлан бүтээх төвд 3-5 жил суралцаад мэргэжлийн үнэмлэхтэй төгсдөг гэж сонссон. Энэ үнэн үү?

–Мэргэжлийн үнэмлэхтэй төгсөх боломжгүй. Харин олон жил манай дугуйланд суралцсаныхаа дараа дүрслэх урлагийн болон, үйлдвэр урлалын сургуулиудад гүнзгийрүүлэн сурахад үндсэн суурьтай байдгаараа давуу талтай. Урлан бүтээх төвийн сургалтад сурчихаад цааш нь гүнзгийрүүлэн сураад одоо эндээ багшаар ажиллаж буй хүмүүс ч бий.

Т.ХҮСЛЭН