Хойд Солонгос байгуулагдсаны 76 жилийн ойг тохиолдуулан Орос, Хятадын удирдагчид Ким Жон Унд баярын мэндчилгээ илгээсэн байна. Эрх баригч Ажилчны намын сонин болох Родонг Синмун Даваа гаригт мэдээлснээр, ой болохоос нэг өдрийн өмнө буюу Ням гаригт Пёньяны төвд томоохон баяр ёслолууд зохион байгуулагдлаа. Мөн Оросын ерөнхийлөгч Путин өнгөрсөн зургадугаар сард удирдагч Ким Жон Унтай уулзсан талаараа мэндчилгээндээ дурдсан байна. Тэрбээр хамтын хүчин чармайлтын үр дүнд хоёр орны иж бүрэн стратегийн түншлэлийн харилцаа улам бэхжинэ гэж бичсэн байжээ.

Хятадын дарга Ши Жиньпин мэндчилгээ дэвшүүлэхдээ хоёр орны дипломат харилцаа тогтоосны 75 жилийн ой тохиож байгааг онцолсон байна. Тэрбээр ирээдүйд Пёньянтай стратегийн харилцаагаа гүнзгийрүүлэх хүсэлтэй байгаагаа илэрхийлжээ.

Япон, АНУ, Өмнөд Солонгос орнууд аюулгүй байдлын хамтын ажиллагаагаа гүнзгийрүүлж байгаа энэ үед Хойд Солонгос хүчтэй түнштэй гэдгээ онцлох гэж оролдсон гэж шинжээчид үзэж байна. Өмнөд Солонгосын Ёнхап агентлагийн мэдээлснээр, Ши Жиньпин сүүлийн найман сарын хугацаанд Хойд Солонгостой хөндий харилцаатай байсан тул Путин мэндчилгээ дэвшүүлэхтэй зэрэгцэн харилцаагаа сэргээхийг хүсч байна.