ОХУ-ын нисгэгчгүй нисэх онгоц агаарын орон зайг нь зөрчсөн гэж НАТО-ийн гишүүн хоёр орон Ням гаригт мэдэгдлээ. Тодруулбал, ОХУ-ын арми Дунай мөрний дээгүүр Украин руу Ням гаригийн шөнө довтлох үеэр нэг нисгэгчгүй онгоц Румыны агаарын хилийг зөрчжээ. Мөн өмнөх өдөр нь өөр нэг нисгэгчгүй онгоц Латвийн хилийг зөрчиж, осолдсон байна.

Румын улс энэ хэрэгтэй холбоотойгоор агаарын орон зайгаа хянахын тулд "F-16" байлдааны онгоцуудыг байрлуулжээ. Мөн зүүн хилийн дагуух хоёр бүс нутгийн оршин суугчдад текст хэлбэрээр анхааруулга хүргэсэн байна. Румын, Украины хил дагуух суурьшлын бус бүсийг хяналтдаа авсан гэж тус улсын Үндэсний батлан хамгаалах яам мөн мэдэгджээ. Румыны топ дипломатч асан Мирча Геоана хэлэхдээ "ОХУ холбоотнуудын эсрэг санаатайгаар дайрсан мэдээлэл байхгүй ч гэлээ энэ нь хариуцлагагүй бөгөөд эрсдэл дагуулж болзошгүй үйлдэл" гэжээ.

Өмнөх өдөр нь Латвийн Резекне тосгоны ойролцоо ОХУ-ын нисгэгчгүй онгоц унасныг тус улсын Батлан хамгаалахын сайд Андрис Спрудс мэдэгдэв. Резекне нь ОХУ-аас 55 км, Беларусиас 75 км зайд оршдог 25 мянган хүн амтай тосгон юм.

Дээрх хоёр тохиолдлыг авч үзвэл Латвийн агаарын орон зайд ийн нисгэгчгүй онгоц нэвтэрсэн нь ховор тохиолдол. Харин Румыны тухайн Орос, Украины дайн эхэлснээс хойш хэд хэдэн удаа өөрийн нутаг дэвсгэрээс нисгэгчгүй нисэх онгоцны хэлтэрхийг илрүүлжээ. Хамгийн сүүлд л гэхэд энэ оны долдугаар сард ийм тохиолдол гарсан.

"Энэ явдал Оросын түрэмгий үйлдэл Украины хилээс хэтэрсэнийг харууллаа" гэж Украины Гадаад хэргийн шинэ сайд Андрей Сыбиха хэллээ.

Эх сурвалж: AP