Эмэгтэй тамирчдын эсрэг гэр бүлийн хүчирхийллийн хэргүүдтэй Кенийн хөнгөн атлетикийн нийгэмлэг тэмцэж байна. Өнгөрсөн долоо хоногт найз залуу нь шатахуун цацаж, шатаах гэж оролдсоноос биеийнх нь 75 хувь нь түлэгдсэн Уганда улсын тамирчин 33 настай Ребекка Чептегей нас барсан. Түүний найз залуу Диксон Ндиема Марангач мөн адил түлэгдсэн ч эрүүгийн хэрэгт татагдаагүй юм. Чептегейн гэр бүлийнхний хэлснээр тэрээр нас барахаасаа өмнө хэдэн сарын турш найз залуутайгаа маргалдаж байжээ.

Мөн цагдаагийн байгууллага энэ хэргийг хэрэгсэхгүй байгаад бухимдалтай байна.

Эмэгтэйчүүд гэр бүлийн хүчирхийлэлд өртөж, амиа алдсан хэргүүд шил дараалан гарах болсон. Үүний нэг нь Чептегейд тохиолдсон эмгэнэлт явдал байлаа.  Өмнө нь 2021 оны аравдугаар сард хол зайнд гүйгч Агнес Тироп Кенийн баруун хэсэгт орших өндөр уулын хөнгөн атлетикийн бэлтгэлийн төв болох Итен хотод амиа алджээ. Тэрээр нас барахаасаа сарын өмнө эмэгтэйчүүдийн 10 км-ийн дэлхийн рекордыг эвдсэн. Эцэст нь нөхөр Ибрахим Ротич түүнийг хөнөөж, шоронд орсон. Энэ хэргийн шүүх хурал хараахан дуусаагүй байгаа ба Ротич өнгөрсөн оны арваннэгдүгээр сард батлан даалтад гарсан байна.

Шинжээчдийн үзэж буйгаар дэлхийн дэвжээн дэх шилдэг эмэгтэй тамирчдын санхүүгийн амжилт нь хамтран амьдрагчдад нь ихээхэн нөлөөлдөг.

Тухайлбал, найз залуу, нөхөр нь тухайн тамирчны хөрөнгө мөнгө, карьерыг хянах гэж оролддог бөгөөд энэ нь гэр бүлийн хүчирхийллийн эхлэл болдог аж. Найбори хотод байрладаг сэтгэл судлаач Миллисент Гатони Семафор хэлэхдээ "Зарим хамтран амьдрагчид тамирчин эмэгтэйн бүх зүйлийг хянахыг хүсдэг. Тамирчны ялалт, тэтгэмж зэргээс гадна хаашаа юу хийх гэж явж байгааг нь хянах гэж оролдсоноос болж зөрчилдөөн үүсгэдэг. Өөрөөс нь илүү амжилттай байгаа найз охин, эхнэртээ атаархаж хэн нь гэрийн эзэн бэ гэдгийг мэдрүүлэхийг хүсдэг" гэжээ. Мөн ямарваа нэгэн спортын холбоо эмэгтэй тамирчдад зориулж эрх зүйн дэмжлэг үзүүлэх ёстойг сануулсан байна.

Сүүлийн жилүүдэд Кени улсад эмэгтэй тамирчдын амь насыг хөнөөсөн хэрэг удаа дараа гарсан ч өнөөг хүртэл алуурчдын эсрэг нэг ч арга хэмжээ аваагүй аж.

Гэр бүлийн хүчирхийллийн хохирогчдод шударга ёсыг тогтоох нь зүй ёсны хэрэг гэж үзсэний үндсэн дээр Кенийн хөнгөн атлетикийн нийгэмлэг олон улсын эрх зүйн байгууллагуудтай хамтран ажиллах болжээ. Хүчирхийлэл нь Кени улсын нийгэмд тулгардаг хамгийн том асуудал бөгөөд зөвхөн эмэгтэй тамирчдад хамаарагдахгүй.

Өнгөрсөн нэг жилийн хугацаанд хамтран амьдрагч, гэр бүлийн гишүүнийхээ гарт амиа алдсан хүмүүсийн тоо өндөр байсан тул "#EndFemicideKE" хөдөлгөөн тус улсад өнгөрсөн нэгдүгээр сараас хойш өрнөж байна.

Кени улсын Спортын танхимын нарийн бичгийн дарга Кипчумба Муркомен "Чептегейн нас барсан эмгэнэлт явдал нь сүүлийн жилүүдэд болж буй хүчирхийллийн нөхцөл байдлыг харуулж байна. Манай байгууллага жендерт суурилсан хүчирхийлэлтэй тэмцэхийн тулд илүү их зүйл хийх ёстойг хатуу сануулж байна" гэжээ.

Эх сурвалж:SEMAFOR