Өнгөрсөн долоо хоногийн Лхагва гаригт /2024. 09.04/ Жоржиа мужийн Апалачи ахлах сургуульд гал нээж, дөрвөн хүний аминд хүрсэн Колт Грейгийн ээж хэрэг гарахаас 30 минутын өмнө сургуулийн захиргаа руу утасдаж сэрэмжлүүлэг өгсөн байжээ. Энэ талаар ээжийнх нь эгч буюу Колт Грейн нагац эгч Энни Браун мэдүүлэг өгөхдөө хэлсэн байна. Тухайлбал, Энни Браун мэдүүлэгт "Миний дүү хүүгийнхээ хачин жигтэй байгааг гадарлаж байсан. Хэргийн өдөр буу гэрт нь байхгүй байгааг мэдээд сургуулийн захиргаа руу утасдаж яаралтай Колтыг олж илрүүлэхийг хүссэн. Мөн нийтэд нь онцгой байдал зарлахыг анхааруулсан" гэжээ. Мөрдөн байцаагчид Энни Брауны мэдүүлгийн дараа сургуулийн дуудлага хийсэн бүртгэлийн шалгасан байна.

Тэнд Грей гэр бүлийн утаснаас сургуулийн утас руу хэрэг гарахаас 30 минутын өмнө залгасан нь харагдах бөгөөд 10 гаруй минут ярьсан байсан нь бүртгэгджээ.

Колт Грейгийн шүүх хурал өнгөрсөн Баасан гаригт /2024.09.06/ болж, түүнийг 14 настай Мейсон Шермерхорн, 14 настай Кристиан Ангуло, 39 настай Ричард Аспинволл, 53 настай Кристина Ирими нарыг хөнөөсөн хэргээр буруутгажээ. Түүний аав 54 настай Колин Грэй ч мөн шүүх хуралдаанд оролцсон бөгөөд хүүдээ зэвсэг эзэмшүүлэх зөвшөөрөл олгосных нь төлөө санаатайгаар бусдын амь насыг хөнөөсөн, хоёрдугаар зэргийн аллага үйлдсэн хэрэгт буруутгагдаж байгаа юм.

Колин Грей мэдүүлгийн үеэр хүү нь сургууль дээрээ дээрэлхүүлдэг байсан талаар ярьжээ.

Мөн аав,ээж нь салсан явдал хүүгийн сэтгэл зүйд хүчтэй нөлөөлсөн талаар ярьсан байна. Үе тэнгийн хүүхдүүдийн дээрэлхэлт, гэр бүлийн асуудлаас болж Колт Грей сэтгэл гутралд өртөж, уур уцаараа гадагшлуулахын тулд гал нээсэн гэж шинжээчид үзэж буй. Аав нь мөн хэлэхдээ "Би хүүдээ бууны сайн, мууг зааж өгдөг байсан. Миний хүү хэзээ ч ийм хүүхэд байгаагүй, ухамсартай, зөв бодолтой хүүхэд байсан. Гэхдээ нэг л мэдэхэд өөрчлөгдөж танигдахгүй болсон байсан. Үнэндээ миний худалдаж авч өгсөн буу түгжээтэй шүүгээнд хадгалагдаж байсан ч Колт хэрхэн гаргаж авсныг мэдэхгүй байна" гэжээ.

Эх сурвалж: SKY NEWS