Цахим спортын "CS2" төрлийн томоохон тэмцээнүүдийн нэг болох "ESL Pro League"-ийн 20 дахь улирал Мальта улсад эхэлсэн. Нийт 750 мянган ам.долларын шагналын сантай тус тэмцээнд тив, бүс нутаг бүрийн шилдэг 32 баг өрсөлдөж байна. Ази тивээ төлөөлөн Монголын "The MongolZ" болон "ATOX Esports" багууд оролцож буй.

"The MongolZ"-ийн хэсгийн шатны тоглолтууд дуусч, тэд хасагдах шатанд оролцохоор шалгарлаа. Азийн тэргүүн багийн хувьд хэсэгтээ хоёр хожигдож, гурав хожсон гэх үзүүлэлттэй шалгарав. Өчигдөр/2024.09.08/ тэд хэсгээс шалгарах сүүлийн эрхийн төлөө Францын "3DMAX" багтай дахин учраа таарсан. Өмнө нь тэд хоёр удаа тоглоход Францын баг бүрэн илүүрхсэн түүхтэй. Тэгвэл энэ удаад байдал өөрчлөгдөж, "The MongolZ" 2-0 гэсэн харьцаатай хүчтэй өрсөлдөгчөө буулган авчээ. Ингэхдээ "3DMAX"-ийн хамгийн сайн тоглодог "Anubis" дээр тэднийг хожсон юм.

Хасагдах шат есдүгээр сарын 18-наас эхлэх учир "The MongolZ" баг дахин 10 хоногийг Мальтад өнгөрүүлэхээр болж байна.

Харин Монголын өөр нэгэн баг болох "ATOX Esports"-ийн Мальта дахь аялал есдүгээр сарын 11-нээс эхэлнэ. Тэдний эхний учраа нь дэлхийн шилдгүүдийн нэг "Vitality" баг. Байгуулагдаад удаагүй байгаа "ATOX"-ийн хувьд тун сайн амжилтыг үзүүлж байгаа. Энэ ч утгаараа анхны томоохон "LAN" тэмцээндээ оролцоход бэлэн болжээ. "dobu", "kabal" гэсэн Монголын цахим спортын түүхэн дэх шилдэг хослолуудын нэг "ZywOo"-ийн багийг барьц алдуулж чадах болов уу? Ямартай ч тэдний Европыг зорих виз гарч, Мальтаг зорьсон.