Нигери улсад шатахуун тээвэрлэж явсан автомашин ачааны машинтай мөргөлдсөнөөр дэлбэрэлт болж, 48 хүн нас барав. Харин ачааны машин нь үхэр тээвэрлэж явсан бөгөөд тэдгээрийн 50 нь амьдаараа шатжээ. Нигери улсын Онцгой байдлын алба эрэн хайх, аврах ажиллагааг үргэлжлүүлж байна.

Ослын дараа эхлээд 30 цогцос олсон боловч сүүлд нь дахин 18 цогцос нэмэгджээ. Нас барагсдыг бөөнөөр нь оршуулсан байна.

Нигери бол Африкийн хамгийн олон хүн амтай улс. Ачаа тээвэрлэх төмөр замын систем байхгүйгээс 220 сая гаруй хүн амтай тус улсын ихэнх гол зам дагуу хүнд даацын машин осолдох нь элбэг. Мэргэжилтнүүдийн хэлж буйгаар ихэнх осол нь анхаарал болгоомжгүй байдал, замын эвдрэл гэмтэл, засвар үйлчилгээ сайн хийгээгүй тээврийн хэрэгслээс болдог. 2020 онд л гэхэд шатахуун тээврийн 1531 автомашин осолдож, 535 хүн амиа алдан, 1142 хүн бэртэж гэмтжээ.

Дашрамд дурдахад, Нигери улсын Үндэсний газрын тосны компани өнгөрсөн долоо хоногт шатахууны үнээ 39 хувиар өсгөсөн. Энэ нь жилийн хугацаанд хийгдэж буй хоёр дахь томоохон өсөлт байв. Үнэ нэмэгдсэн ч улс даяар шатахууны хомсдол нүүрлэсэн хэвээр байгаа тул томоохон хот, суурингуудын шатахуун түгээх станцууд байнгын дараалал, хүлээлэг ихтэй байна.

Эх сурвалж: AL JAZEERA